W aplikacje do biéganiô szło òbaczëc, gdze òb czas służbë i pò służbie trenindżi robilë szandarzë.
Szwédzczé media ùjawniłë, że czile szandarów ze szwédzczi Pòlicje Bezpiekù brëkòwało pòpùlarny mòbilny aplikacje Strava do registrowaniô fizycznëch aktiwnosców, a swòje aktiwnoscë ùprzëstãpniwelë jakno pùbliczné. Robilë to równak colemało òb czas towarzeniô pòlitikóm i nôleżnikóm królewsczi rodzëznë w jich dodomach a téż na wëjazdach. Razã z aktiwnoscama w aplikacje szło ùzdrzec lokalizacje, w jaczich sã jich pòdjimelë, a téż òdjimczi z trasów. Na ten ôrt òchróniarze bezswiądno ùprzëstãpnilë priwatną adrésã mieszkaniô premiérë Ùlfa Kristerssona, trasë pò jaczich sóm biégôł, a téż place krajewëch i zagrańcznëch wizytów. Òchróniarze króla Karola Gùstawa delë za to do wiadë, gdze mònarcha jezdzył na ùrlopë. Pòdôwczi przistãpné bëłë w aplikacje ju òd dwa tësące piãtnôstégò rokù, tak tej zebrałë sã tam téż infòrmacje ò ùszłëch premiérach i jinszich pòlitikach, jaczich barniła Pòlicjô Bezpiekù. Szefòwô Carolina Björnsdotter Paasikivi wëdała òswiôdczenié, w jaczim przëznała, że procedurë bezpiekù òstałë drãgò narëszoné, a profilë szandarów òstałë ju rëmniãté z aplikacje razã ze wszëtczima zapisama aktiwnosców.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie