We wtórk, 4 gromicznika, w Szëmôłdze bëła promòcjô ksążczi "Fòrmë lubią normë. Gramatyka kaszubska w działaniu" napisóny przez dr Joanã Ginter. Aùtórka pieszczotlëwò gôdô ò ni "formusie" i zagwësniwô, że gramatika mòże bëc lubkô i letkô do zrozmieniô.
- Jem gwës, że "Fòrmë" mògą sã przëdac òsoblëwie szkólnym òd kaszëbsczégò. To colemało nie są lëdze, co skùńczëlë pòlską (abò jinszą) filologiã, ale z pierszégò warkù szkólny òd wczasnoszkòłowi edukacje, religie, historie, nôtërnëch przedmiotów. Żelë òni nie bëlë na kaszëbisticznëch sztudiach, tej gramaticzi ùczëlë sã np. 20 lat nazôd – i z kôrbiónków z wiele taczima szkólnyma wiém, że òni wëzérają za wspiarcym nié blós w ùczenim gramaticzi, ale téż w sami gramatice.
To słowa dr Joanë Ginter zapitóny ò to, do kògò w pierszi rédze je czerowónô ji ksążka. Aùtórka pòdczorchiwała równak, że "Fòrmë lubią normë" bãdą pòmòcą téż dlô ùczniów (òsoblëwie w strzédnëch szkòłach) i ùstnëch, co chcą sami ùczëc sã kaszëbsczégò jãzëka.
Promòcjô zaczãła sã òd filmù ò szëmałdzczi gminie i ji rozwiju, a pózni ju przédną herojką bëła pùblikacjô Joanë Ginter. Rozegracjã prowadzëła Lucyna Radzymińskô z Bióra Kaszëbskò-Pòmòrsczégò Zrzeszeniô, a ò znaczenim ti pùblikacje dlô piastowaniô i rozwiju kaszëbiznë gôdelë m.jin. dr Justina Pòmierskô, prof. Mark Cybùlsczi (nôùkòwi recenzent ksążczi), przédnik KPZ Jón Wërowińsczi i sama aùtórka.
Rôczimë do òbezdrzeniô òdjimków Paùla Wiczińsczégò z tegò wëdarzeniô i ju terô zachãcywómë do przeczëtaniô czekawi wëdowiédzë z Joaną Ginter, jakô bãdze w nôblëższim numrze miesãcznika "Pomerania".
Twoje zdanie jest ważne jednak nie może ranić innych osób lub grup.
Komentarze opinie