Gòspòdarze wsów wëmienilë sã doswiôdczeniama i pòzdrzatkama na codniowé trëdnoscë, z jaczima parłãczi sã robòta szôłtësa.
W sobòtã 19. rujana w Dodomù Kùlturë w Ritlu w gminie Czersk zòrganizowónô òstała III Kònferencjô Szôłtësów Pòmòrzégò. W pòtkanim wzãło ùdzél kòl 200 gòscy. Bëlë to nié blós szôłtësowie czë nôleżnicë szôłtësczich radzëznów, ale téż ùczałi taczi jak bëlny kaszëbsczi socjolog Cezari Òbracht-Prondzyńsczi, chtëren gôdôł ò dzysdniowëch globalnëch pòzmianach i jich cëskù na żëcé w szôłtëstwach, a téż nowëch zadaniach, przed jaczima stôwają szôłtësowie. Bëtnicë wëdarzeniô wëmieniwelë sã téż doswiôdczeniama sparłãczonyma z prawnym fùnksnérowanim wsów, mòżlëwòtama zwëskiwaniô dofinancowaniów czë téż wëzwaniama taczima jak zjawiszcze hejtu na wsë.
„Przekazéwómë swòjã wiédzã i doswiôdczenié, kò takô je téż misjô naji stowôrë: żebë twòrzëc rëmiã do wespółrobòtë i pòdnôszaniô swòjich kómpetencjów” – pòdrechòwiwô zetkanié przédnik Stowôrë Szôłtësów Pòmòrzégò, Michôł Nowak.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie