Reklama

Wòtum zawierzeniô i absolutorium dlô wòjewództwa

Klëka

01/07/2025 12:40

Na sesje radny òbgôdelë z marszôłkã stojiznã wòjewództwa w łońsczim rokù. Dobrze je z baną, energetiką i kùlturą, gòrzi z pòùczëną, psychiatrią i demògrafią.

W pòniedzôłk trzëdzestégò czerwińca bëła absolutoriowô sesjô Sejmikù Pòmòrsczégò Wòjewództwa. Na zôczątk marszôłk Mieczësłôw Struk przedstawił rapòrt ò stojiznie wòjewództwa w łońsczim rokù. Wedle niegò pierszi rôz òd czile lat w wòjewództwie spadła wielëna lëdztwa, a stojizna rënkù robòtë je stójnô. Rosce rozwij turisticzi i kùlturë a téż kwalita medicznëch ùsłëgów, chòc tôklã są felënczi lékarzów. Pòmòrsczé òstôwô krajowim lidérą w wëzwëskanim banë. Sétmëdzesąt szesc procent energeticznëch brëkòwnotów wòjewództwò zaspòkòjiwô z gwôsny produkcje. Òb diskùsjã nad rapòrtã radny zmerkelë téż w nim felënczi pòdôwków o gbùrzëznie i rëbaczenim. Delë téż bôczenié na jiwrë w pòùczënie, na przëmiar niższé wëniczi w nôùce dzecy ze wsë w przëmierzenim do tëch z wiôldżich gardów, a téż na przefùlowanié psychiatricznëch òddzélów w bòlëcach. Pò òbgôdkach radny delë wòtum zawierzeniô dlô zarządzënë wòjewództwa. Dali marszôłk Struk przedstawił zdanié sprawë z financów: zadłużenié je niższé jak krajewô strzédnô, a wzątczi wòjewództwa ùdało sã zrealizowac we wnetka dzewiãcdzesąt òsmë procentach. Radny ùznelë legalnosc dëtkòwégò gòspòdarzënkù i zawelowelë za ùdzelenim absolutorium.

H.S.Sz.