Znajarze pòdelë, że tëli deszczu co w piątk w nocë w tim regionie spôdô rôz na sto lat.
W piątk czwiôrtégò lëpińca reno w Teksasu przez niespòdzóno mòcny deszcz wëbiła rzéka Gùadalupe. Jak pòdôwô gùbernatór stanu Dan Patrick, deszczu przez czile gòdzyn spadło tëli co zwëczajno przez miesąc, a w jednym placu przez sztërdzescë piãc minut wòda pòdniosła sã ò òsmë métrôw. Meteòrologòwie nie przewidzelë jaż taczich òpadów i nie wëdelë òstrzégów dlô lëdztwa ani służbów. Nôgòrszô stojizna je w grôfstwie Kerr, gdze przez zalenié zdżinãło co nômni dwadzesce sétmë òsób, w tim òsmënòsce dozdrzeniałëch i dzewiãc dzecy, a òsmëset sztëk lëdzy bëło ewakùòwóné. W gardze Ingram ùsadzelë centrum pòmòcë dlô pòszkòdowónëch, gdze zwòżony są ùretony z zaleniégò, a téż rodzëznë jaczich blëżny i miectwa ùcerpielë przez bôłdzã. Dérëje szëkba za dwadzesce piãc dzéwczãtama, jaczé bëłë na chrzescëjańsczich kòloniach w znikwionym przez wòdã lôgrze Camp Mystic na przedgardzym Kerrville. Wedle wëszëznów òne mògłë sã ùretac i na przëmiôr pòwchadac na drzewa, skądka równak ni mają jak sã skòntaktowac z retownikama.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie