Reklama

Zamkną kawnice, żebë sã doùczëc

Klëka

17/06/2026 15:12

Òdj. https://pl.wikipedia.org/wiki/Starbucks#/media/Plik:Starbucks_Ueno.jpg

Pôłniowòkòrejańsczi Starbucks próbùje ùprawic swój wizerënk pò tim, jak w maju zabédowôł klijentóm promòcjã na roczëznã krëwawi mùżdżówczi.

Wikszosc kawniców Starbucks w Pôłniowi Kòreje mô sã zamknąc w pòniedzôłk dwadzestégò drëdżégò czerwińca ò trzecy pò pôłnim na pół dnia. Òd przez dwa tësące lokalów òdemkłé bãdze leno czile pùnktów na wikszich latawiszczach. Stratë, jaczé w tim czasu pòniese firma, są taksowóné na dwa miliardë sto miliónów wònów, co je równoznaczëną kòl piãc miliónów szescdzesąt dwùch tësący złotëch. W tim czasu robòtnicë kòrpòracje razã z Dzong Jong-dżinã, przédnikã grëpë Shinsegae, do jaczi nôleżi Starbucks Korea, mają òbezdrzec wëkładë ò nônowszi historie Kòreji i przeńc przëùczbienié ze spòlëznowi wrazlëwòscë. Firma pòdjimnãła tã decyzjã jakno òdpòwiesc na pògòrchã z ùszłégò miesąca. Kòrejsczi part Starbucksa zabédowôł tedë promòcjã na wielerazowé plastikòwé bacherczi w òbrëmim akcje „Tank Day”. Miała òna ùpamiãtniwac roczëznã wëdarzeniów z òsmënôstégò maja tësąc dzewiãcset òsmëdzesątégò rokù, znónëch jakno mùżdżówka w Gwandzu. Tedë wòjska wësłóné przez aùtoratirnégò prezydenta Dzon Du-hwana sëłą zdławiłë prodemòkraticzné protestë zabijającë sto szescdzesąt piãc òsób i reniącë wnet tësąc. Ùdba, żebë taczé zdarzenié przëwdarzëc promòcją na bacherczi, rozgòrzëła Kòrejańczików, jaczi rëgnãlë z bòjkòtã Starbucksa, nikwilë kùbczi ë jinszé zachë z logã marczi. Przédny direktór ùstąpił ze stanowiszcza, a minister bënowëch sprôw Jun Ho-dzung zakôzôł robòtnikóm swòjégò resortu brëkòwaniò produktów ze Starbucksa. Wezwôł do tegò téż jiné pùbliczné institucje.

H.S.Sz.

Źródło i opracowanie własne Aktualizacja: 17/06/2026 21:21