Zamòrdowôł ritualnym nożã

Reniony òsmënôscelôtk ùmarł òb czas interwencje szandarów. Ti próbòwelë aresztowac jegò i nie wierzëlë mù, że béł żgniãti.

W pòniedzôłk pierszégò czerwińca sąd w Southampton wëdôł wërok w sprawie głosnégò mòrdarstwa z gòdnika łońsczégò rokù. Òb czas sztridu midzë òsmënôscelatnym sztudérą Henryk Nowôkã a dwadzescetrzëlatnym Vickrumã Digwą, wëznôwcą sikhizmù, ten drëdżi ùżił noża. Barniô mô krzëwé òstrzé dłużawë dwadzesce jeden centimétrów. To wiele wicy jak pòzwôlają przë sobie miec britijsczé przepisë, ale wëjątk robiony je dlô tëch noszonëch z religiowëch pòwòdów. Wëznôwcë sikhizmù, òsoblëwie pòspólnotë khalsa (czësti), noszą taczé noże, dolchë abò miecze, zwóné kirpanama, jakno symbòl przënôleżnoscë do swòji religie. Taką barnią Vickrum Digwa czile razy żgnął sztudérã, a tej zaczął nagrëwac gò mòbilką. Czej przëjachelë szandarzë, gôdôł jim, że je òfiarą rasystowsczégò atakù. Herny Nowôk gôdôł pòlicje, że je reniony, krëwawi ë ni mòże òddëchac, ale ti nie delë temù wiarë, skłódkòwelë mù rãce i chcelë gò zabrac do aùtoła. Sztudéra równak ùmarł na jich òczach. Całosc nagrałë kamerë na ruchnach szandarów. Wiada ò mòrdarstwie i dzejaniach pòlicje sprawiła wiôldżi pòrëch ù britijczików, w tim czãstszé ataczi na spòlëznã sikhów i wezwë do zakôzaniô jim noszeniô przë sobie kirpanów, a przënômni taczich, jaczima pò prôwdze jidze kògò zrenic. W wërokù sąd w Southampton skôzół Vickruma Digwã na dosmiertną sôdzã. Jegò mëmka, jakô zabrała nóż z placu zdarzeniô, òstała òbskôrżonô ò pòmòc w zbrodnie. Swój wërok ùczëje w lëpińcu. Lëdze równak domôgają sã ùjawnieniô pòdôwków szandarów, jaczi nie pòmòglë òfierze, a téż drãdżégò jich ùkôraniô. Jich sprawą zajimô sã britijsczi Niezanôleżny Ùrząd do sprôw Dzejaniów Pòlicje.