Do mòrdarstwa doszło w chëczë, w jaczi szandarzë czãsto biwelë. Òfiarama je troje ji mieszkańców.
W niedzelã dwadzestégò lëpińca w aùstriacczim Linzu na banowiszczu zatrzimóny òstôł trzëdzescësétmëlatny spiti Słowôk. Òkróm bëcô w nietrzézwòscë zdôwôł sã bëc òglowò w lëchi psychiczny stojiznie, tak tej szandarzë zabrelë gò do bòlëcë. Tam ùdało sã z nim dogadac – wëznôł, że mô zabité trzë òsobë w Bajerach. Pòdôł adres chëczë w bajersczim Zwiesel, w jaczi mieszkôł razã z szesc jinszima òsobama. Béł to plac ju znóny służbóm z pòzdrzatkù na czãsté wezwania związóné z nadùżiwanim alkòholu, robienim trzôskù czë z narkòtikama. Na drëdżi dzéń w fest zasmieconym mieszkanim szandarzë nalezlë cała dwadzescedwalatny białczi i piãcdzesątszesclatnégò chłopa z Niemiec, jaczi bëlë pôrą, a téż dwadzesceszesclatny białczi, jaczi nôrodnosc nie òstała pòdónô. Jedno z całów òstało rozrąbóné na sztëczczi i schòwóné w lodownicë. Do smiercë òfiarów doszło czile dni przódë. Jedna z sąsôdków pòdała pòlicje, że dwòje mieszkańców wëcygło z chëczë ju dwa tidzenie nazôd. Nie je wiedzec, co z sódmim mieszkańcã bùdinkù. Mòtiw sprôwcë mòrdarstwa nie je znóny.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie