Reklama

Biôłoruscë grozëlë Nigerijczikòwi we Gduńskù

Klëka

20/09/2025 13:24

Òdj. https://pomorska.policja.gov.pl/pom/informacje/wiadomosci/148930,Przystawili-lufe-do-glowy-i-kazali-jechac.html

Taksówkôrz nie dôł sã zastraszëc atakòwnikóm i òstawił jich w aùtole samëch.

W sobòtã trzënôstégò séwnika krótkò przed dwanôstą w nocë na kòmisariace we Wrzeszczu dwadzescesétmëlatny òbëwatel Nigerie zgłosył atak. Jakno czerowca taksówczi, wzął do aùtoła z Wrzeszcza dwùch chłopów, ti kôzelë mù jachac do Sopòtu. Czej szoféra jim rzekł, że mòże pòjachac, ale to bãdze wicy kòształo, jeden z nich wëjął pistól i przëłożił mù do głowë, grożącë że je parôt gò zastrzelëc. Nigerijczik równak zatrzimôł wóz i z niegò wësadnął a òdebiégł, wòłającë pòmòcë. Bandicë sã tegò nie spòdzéwelë i zarô zwiornãlë z taksówczi. Szoféra do ni wrócył i pòjachôł zarô na kòmisariat.
Gduńskô Pòlicjô zajãła sã sprawą. Wedle jich wëdowiédzë, pòszukiwóny z zôczątkù mieszkelë we Gduńskù, ale przenieslë sã do Sopòtu. Tam w jednym z mieszkaniów szandarzë jich naszlë we czwiôrtk reno, czej òni jesz spelë. Òkôzało sã, że bëlë to òbëwatelë Biôłorusczi, jeden w wiekù sztërdzescë, a drëdżi trzëdzescë dwùch lat. Szandarzë nalezlë téż barniã, jaczi dokònelë przesprawë: pneùmaticzny pistól na szrut. Zatrzimóny ùczëlë ju òbwinë zmùszeniô do òkreslonégò zachòwaniô.

H.S.Sz.