Granat na pierszé wezdrzenié wëzdrzôł za bùlwą, le fritków bë sã z niegò zrobic nie dało. Sapérzë ju wzãlë niewëbùch z fabriczi.
W piątk 17. stëcznika w Lãbòrgù do fabriczi fritków dojachôł niebezpieczny ladënk. Òb czas scyganiô nowò przewiozłëch bùlwów z naczepë na produkcjowi pas, jeden z robòtników nalôzł midzë bùlwama òpiszony piôskã granat. Wzął gò w rãkã i wëniósł bùten. Òstała wezwónô pòlicjô, chtërna przëjachała na plac i zabezpieczëła niewëbùch, jaż nie przëjadą sapérzë. Ti rozpòznelë, że béł to òbrónny sowiecczi granat F1 bez zapôlnika. Nie bëła zarządzonô ewakùacjô, bò fabrika je pòstawionô dalek òd lëdzczich chëczi. Granat òstôł ju zabróny, a sapérzë z 1. Zmechanizowónégò Batalionu w Lãbòrgù bezpieczno gò zneùtralizëją na pòligònie. Chòc granat ni miôł zapôlnika, to sapérzë dëlë bôczenié, że branié gò w rãkã bëło wcyg niebezpieczné, a zajëmac bë sã tim mielë leno znajarze.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie