Etnotank ò dzejaniach młodëch

Aùtorzë rapòrtu są dbë, że wicy òn sã mòże przëdac prawie młodim chcącym òddólno dzejac, jak przédnikóm institucjów i przedstôwcóm sztërzech władzów.

We czwiôrtk dwadzestégò trzecégò rujana w Zalë Radzëznë Filologicznégò Wëdzélu w bùdinkù Neòfilologie na Gduńsczim Ùniwersytece bëło zetkanié projektu Etnotank. Pò wprowadzenim przez profesora Cezarégò Òbrachta-Prondzyńsczégò zaprezentérowóny tam òstôł rapòrt pòd titlã „Aktiwizna młodëch Kaszëbów”, zrëchtowóny przez sztudérów kaszëbsczi etnofilologie Kònrada Kòwalsczégò i Huberta Sylwestra Szirka. Robòta nad nim dérowała przez zymk i lato tegò rokù, a w rapòrce przeczëtac bãdze szło wstãp ò rolë młodëch w historie kaszëbsczi rësznotë, przëmiarë dzysdniowëch inicjatiwów rëchtowónëch przez młodëch a téż gôdczi z niechtërnyma pòdjimarzama. Pò prezentacje zebróny – w machtnym dzélu sztudérzë i absolwencë kaszëbsczi etnofilologie i nôleżnicë a sympaticë Karna Sztudérów Pòmòraniô – zadôwelë swòje pitania i przedstôwielë bédënczi. Zôs wëbrzëmiałë głosë ò brëkòwnocë zemklészi integracje i szérzewieniô wiadła ò blëskòscë pòzdrzatków młodëch Kaszëbów na przińdnotã. Pòrëszoné bëłë téż témë òdchôdaniô młodëch òd tradicjowi kaszëbsczi kùlturë a achtnieniô dlô jãzëka, felënkù zawierzeniô a nawetka znajomòtë wedle institucjów jak Kaszëbskò-Pòmòrsczé Zrzeszenié, a téż mùszebnotë twòrzeniô nowëch brëkòwnotów tam, gdze dzys kaszëbiznã prawie wëzdrzi na niebrëkòwną – tak, żebë kaszëbizna miała szansã przejimac nowé place i stawac sã nazôd elementã codniowòtë, miast bëc le kùlturową cekawinką abò jãzëkã inteligencje. Pò brzadny wëmianie mësli profesór Òbracht-Prondzyńsczi pòdrechòwôł diskùsjã i przërôcził do ùdzélu w pòstãpnëch wëdarzeniach òrganizowónëch przez Etnotank, jak prezentacjô rapòrtu „Cyfrowé Kaszëbë” we czwiôrtk trzënôstégò smùtana i fòrum „Kaszëbi 2050” we strzodã dwadzestégò szóstégò smùtana.