Kùnc sojowégò mòratorium

Jeden z nôwôżniészich ùgôdënków procëm defòrestacje Amazonie mòże òprzestac òbrzeszëwac pò tim, jak wëcopałë sã z niegò wôżné firmë.

Brazylijskô Stowôra Producentów Roscënowëch Òlejów ògłosëła w tim tidzeniu, że dzél nôleżników òrganizacje wëcopiwô sã z tak pòzwónégò sojowégò mòratorium. Òbrzesziwało òno òd dwadzesce lat. Béł to ùgôdënk, wedle jaczégò kùpisz semienia soji pòchôdający z terenów Amazońsczich Lasów spùszczonëch pò dwa tësące ósmim rokù, béł zakôzóny. Ò decyzje firmów stowôra dała do wiadë w pierszi rédze brazylijsczémù stanowi Mato Grosso. Òd pierszégò stëcznika w tim stanie firmë, jaczé miałë mòratorium pòdpisóné, stracëłë pòdatkòwé zeldżi, chtërne dotąd jim słëchałë. Producencë skarżëlë sã na ùgôdënk ju òd dôwna. Wskazéwelë, że w praktice nakłôdôł òn na nich drãżészé ògrańczenia jak brazylijsczé prawò, bò no gbùróm w Amazonie pòzwôlało spùszczac lasë na dwadzesce procentach swòjégò terenu, a mòratorium do czësta jim tegò bróniło. Przédnik stowôrë producentów soji z Mato Grosso Lucas Beber gôdôł, że ùgôdënk béł przërëchtowóny tipiczno pòd eùropejsczi rënk, a leno sztërnôsce procent ekspòrtu brazylijsczi soji trôfiô do Eùropë. Decyzjã negatiwno òbtaksowôł Greenpeace i Swiatowi Fùndusz dlô Rodë – mòże òna strzëmac jeden z nôskùtkòwniészich métlów zascyganiô defòrestacje, a téż program prezydenta Brazylie Luiza Inácio da Silvë, jaczi miôł cawno strzëmac spùszczanié Amazonie do dwa tësące trzëdzestégò rokù. André Lima, sekretéra do sprôw kòntrolë spùszczaniô lasów i planowaniô rëmnégò gòspòdarzënkù w brazylijsczim Ministerstwie Strzodowiszcza, scwierdzył, że przë wëcopanim sã z ùgôdënkù przédnëch ùczãstników rënkù, mòratorium mòże ùznac za ùniewôżnioné.

H.S.Sz.