Sprawã, ò jaką prosył Zełeńsczi, wëdôwô sã bëc dobëtô. Ni ma równak gwësnoscë, jak długò Ùkrajina mdze mògła zwëskiwac z tegò zezwòleniô.
Jak pòdôwają amerikańsczé media, prezydent Zjednónëch Stanów Joe Biden na dwa miesące przed zdanim ùrzãdu i przekôzanim rządów Donaldowi Trumpòwi zgòdzył sã na brëkòwanié przez Ùkrajinã amerikańsczich rakétów procëm célóm w głãbie Rusczi. Mô bëc to òdpòwiesc na dzejania prezydenta Rusczi Władimira Pùtina, chtëren scygnął do wòjnë procëm Ùkrajinie żôłnérzi z Nordowi Kòreje.
Barniô mô bëc ùżëtô procëm òddzélóm rusczi armie zagrôżającym sëłóm Ùkrajinë w òkòlim Kùrska pò rusczi starnie grańcë.
Tegò pòzwòleniô òd dłudżégò czasu domôgôł sã prezydent Ùkrajinë Wòłodimir Zełeńsczi, chtëren tak skòmentowôł doniesenia: „Dzys wiele mediów gôdô ò tim, że më dostelë zezwòlenié na pòdjimniãcé brëkòwnëch dzejaniów. Ale razów nie wëmiérzô sã słowama. To nie są rzeczë do ògłôszaniô. Rakétë przemówią same za sebie”.
Nie je wiedzec, czë pò swòjim pòwroce do Biôłégò Dodomù Donald Trump copnie decyzjã Bidena. Kandidat Repùblikanów wëbróny na prezydenta w latosëch welacjach kònsekwentnô zapòwiôdôł ògrańczenié wòjskòwi pòmòcë dlô Ùkrajinë. Cwierdzył téż, że dzãka jegò rządóm wòjna tegò kraju z Rusją skùńczi sã baro chùtkò.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie