Pò 100 latach wcyg wôżné

Prôwdac dokazë ks. Paùla Panske są szerok cytowóné, kò wëdóné pò niemieckù zwãżałë na Kaszëbach karno bezpòstrzédnëch czëtińców. To sã prawie zmieniło. Bënômni, żlë jidze ò dwa tekstë ò bëtowsczi szlachce. Panske je jednym òd nôlepszich pòmòrsczich historików pierszi pòłowë XX w.

Jegò dokazë ò bëtowsczi szlachce, Człëchòwie, Tëchòlë, Chònicach i òsoblëwie ò Kòsznédrach, z chtërnëch pòchòdzył, wcyg są wôżną lekturą dlô badérów. – Béł bëlno wësztôłcony. Rozmiôł òkróm niemiecczégò, łacëznã, pòlsczi, grekã, hebrajsczi, interesérowôł sã arabsczim, chaldejsczim, sanskritã. Do te miôł fòtograficzną pamiãc. A czej zdrzã na niegò jakno dzysôdniowi historik, zôzdroszczã mù leżnoscë òbôczeniô wiele stôrëch dokùmentów, epitafiów, plat nôgrobnëch itd., jaczé pózni zdżinãłë abò sã rozjãłë w wòjnã. Jegò dokazë wcyg są aktualné – òpisëje pòstacjã Panske dr Tomôsz Rembalsczi z Gduńsczégò Ùniwersytetu.

Prawie T. Rembalsczi z Przemësławã Pragertã wzãlë sã za nôùkòwą redakcjã dolmaczeniów na pòlsczi dwùch tekstów Paùla Panske: „Z dzejów rodny szlachtë bëtowsczi zemie” i „Stołpòwi katolëccë kadecë z bëtowsczi zemie (1769–1811)”. Jich lektura je òbrzészkòwô dlô wszëtczich, chtërny bierzą sã za kaszëbską genealogiã, heraldikã, historiã naszi szlachtë, a òsoblëwie historiã bëtowsczi zemie.

27.10 w Trzebiôtkach (gm. Tëchómie, bëtowsczi pòwiôt) nôùkòwi redaktorzë przedstawilë tłomaczenié wëdóné w jedny ksążce z rédżi „Studia i materiałë z dzejów Bëtowa a bëtowsczi zemie” (tom IV). Ò wëdôwiznie i P. Panske gôdelë téż prof. Cezari Òbracht-Prondzyńsczi a Jerzi Szwankòwsczi.

P.D.

Ksążka z bëtowsczima artiklama P. Panske wëdelë: Kaszëbsczi Institut, Zôpadnokaszëbsczé Mùzeùm i Wëdôwizna BiT. Wëdanié wspiarła Radzëzna Familiów Trzebiatowsczich, bëtowsczi pòwiôt, Stowôra Spôdkòwizna Pòmòrzô m. Bògùsława X, J. i E. Zmùda Trzebiatowszczi, MerCo sp. z o.o.