Pò przeprosënach premiérë prowincje Quebec w 2011 swòjã winã w znikwienim wôżnégò partu kùlturë inujitów ùznałë téż kanadijsczé centralné wëszëznë.
W sobòtã 23 smùtana we wsë Kangiqsujuaq w Nunaviku, inujicczim regionie Quebekù, kanadijsczi minister ds. relacjów midzë Kòruną a rodnym lëdztwã Gary Anandasangaree w miono federalnégò rządu przeprosył za ùdzél kanadijsczich wëszëznów w akcje zabijaniô inujicczich zaprzëżnëch psów qimmiit na przëłómanim lat 50. i 60. ùszłégò stalatégò.
Akcjô zaczãtô tej òddólno przez nie-inujicczich mieszkańców òstała pòtemu wspiartô przez rząd. Pò wprowadzenim ùstawów kôżącëch zabijac wszëtczé psë, jaczé nie bëłë na wãzëszczu – òficjalno przez zagrôżbã chòroscama, jaką miałë sprawiac – kanadijsczi szandarzë wespół z cywilama zabijelë zwierzãta w inujicczich sedlëszczach. Pò smiercë kòl tësąca qimmiit, do jaczi colemało dochôdało na òczach rodzëznów, strzód inujitów prakticzno wëmarł zwëk jachtowaniô i wanożnégò ôrtu żëcégò, jaczi béł ùznôwóny przez rodné lëdztwò za spòdlé jich kùlturë.
Rząd przekôzôł 45 mln kanadijsczich dolarów wënôdgrodë, jakô mô bëc namienionô na òdrodã tradicje psowëch zaprzëgów, m.jin. przez pòstawienié zagrodów, sfinancowanié tresérczi a téż jestkù dlô psów. Part dëtków òstónie przekôzóny téż rodzëznóm, jaczé same stracëłë swòje psë.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie