Reklama

Retowelë wiôlgòrëba w Niemiecce

Klëka

28/03/2026 16:29

Òdj. Whit Welles Wwelles14; zdrzódło: https://pl.wikipedia.org/wiki/D%C5%82ugop%C5%82etwiec_oceaniczny#/media/Plik:Humpback_stellwagen_edit.jpg

Òd pòniedzôłkù lëdze próbòwelë zwierzëcu wrócëc do wòdë. Mùszelë przë tim òpasowac, żebë nie zrenic jegò chòri skórë.

W pòniedzôłk dwadzestégò trzecégò strëmiannika w òbrëmim nadmòrsczi wsë Timmendorfer Strand w Szlezwikù-Holsztinie na snôdczëznie ùtôrknął humbak. Dwadzescetónowi cëcón zapëzglił sã w rëbacczé jadra. Służbë próbòwałë scësnąc gò do wòdë, ale przez czile dni nie ùdało jim sã tegò zrobic. Nie pòmôgałë wòzyczi ani susającô kòpôrka. Służbë nie chcałë téż zrenic humbaka òb czas akcje. Bëło dobrze widzec, że òn mô chòrą skórã, gwës przez nisczé zasolenié wòdë w Bôłce, jaczi nie je nôtërnym strzodowiszczã dlô jegò gatënkù. Przëjachóny badérowie bëlë dbë, że lepi mù nawet nie wszczepiac w tã skórã nadôwnika. Zwãkóm robòtë kòl sebie wiôlgòsz wtórził głosnym mrëczenim. Dopiérze czej w czwiôrtk zaczãlë kòpôrką kùmac wąsczi rów òd snôdczëznë do mòrza, zwierzã samò zaczãło sã nim pòmale przesëwac, a wikszô kòpôrka mù pòmôgała. Robòtã skùńczëlë wieczór, czej felowało jesz dzesãc métrów, żebë dac mù òdpòczic. W nocë z czwiôrtkù na piątk, czej nikògò kòl niegò nie bëło, wal zebrôł w so mòc i kùreszce wëpłënął na mòrze sóm. Czej lëdze to zmerkelë, wësłelë za nim bôtë. Marénowie na nich zameldowelë, że humbak płënie na Lubecką Bùchtã. Służbë dali bãdą wzérałë za jegò turã, żebë sã ùgwësnic, że zôs gdzes nie ùtôrknie na bôłtëcczim sztrądze. Je to gwës ten sóm, jaczégò przódë latos badérowie widzelë w Meklembùrsce i na Przédnëch Pòmrach, a slédny rôz na zôczątkù strëmiannika w pòrce w Wismarze. Gôdają, że nôlepi bë bëło eskòrtowac przez Dëńsczé Zwãżënë nazôd do Nordowégò Mòrza, skąd przepłënął gòniącë za rëbama.

H.S.Sz.

Załączniki