Reklama
Stolëmné gadë wrócëłë na swój òstrów
23/02/2026 12:15
Żółwie-stolëmë chòwałë sã w niewòlë, jaż badérowie ùznelë, że mòże je wëpùscëc na môl, z jaczégò zniknãłë na wnet dwasta lat.
Pò wnet dwasta latach òd wëmrzeniô żółwie-stolëmë (Chelonoidis niger) wrôcają na Floreanã, jeden z òstrowów archipelagù Galapagòs, zwónégò téż Żółwima Òstrowama. Rodnô pòpùlacjô pòdgatënkù Chelonoidis niger niger z Floreanë wëdżinãła w sztërdzestëch latach dzewiãtnôstégò stalatégò. Tësące sztëk pòzabiérelë tedë z òstrowù marénowie, jaczi tak dobëlë sobie jestkù na dłudżé rézë. Wiele lat pòtemù, w dwa tësące ósmim rokù, ùczałi zbadérowelë pòpùlacjã żółwiów z sąsednégò òstrowù Izabela i scwierdzëlë, że tameczny pòdgatënk Chelonoides niger becki mô nôwicy genomù wëmarłëch kùzynów. Przez òdapartnienié pòpùlacjów òd sebie, różnicë pòdgatënkòwé w przëtròfkù żółwiów-stolëmów są baro wôżné. Jinaczą sã do tegò stãpnia, że do dzys nié wszëtcë badérowie są zgòdą, że mòże tu gadac ò jednym gatënkù. W dwa tësące sétmënôstim rokù rëgnął Projekt Ekòlogiczny Òdnowë Floreanë prowadzony przez zarządzënã Nôrodnégò Parkù Galapagòs. Przez krziżowanié żółwiów-stolëmów w niewòlë ùdało sã wëhodowac sto piãcdzesąt òsmë òsobników namienionëch do znôwnégò wprowadzeniô na òstrów. Pò dopłëniãcym do jegò sztrądu starżnicë nôrodnégò parkù zanieslë gadë na wëznaczoné stanowiszcza. Halelë je we wiôldżich karzniach na plecach i piechti przeszlë sétmë kilométrów przez drãdżi wùlkaniczny teren, a tej òstawilë w pasownym môlu. Badérowie gôdają, że to wëdarzenié ò epòkòwim znaczënkù nié blós dlô sami Floreanë, ale téż w òglim dlô historie reintrodukcje wëmarłëch zwierzãt na jich dôwné strzodowiszcza.
H.S.Sz.
Reklama
Komentarze opinie
Podziel się swoją opinią
Twoje zdanie jest ważne jednak nie może ranić innych osób lub grup.
Reklama
Wideo
Reklama
Komentarze