Swiãto lëteraturë we Wejrowie

W Mùzeùm Kaszëbskò-Pòmòrsczi Pismieniznë i Mùzyczi we Wejrowie òstôł rozrzeszony XXV Òglowòpòlsczi Lëteracczi Kònkùrs m. Jana Drzéżdżona. Do òrganizatora (MKPPiM) bëłë wësłóné 22 dokazë, nôwicy wiérztów. Taksowała je kòmisjô pòd przédnictwã Bòżenë Ùgòwsczi, w jaczi òbsãdzëcelama bëlë téż Danuta Pioch i Tomôsz Fópka.

Dobiwcą kategórii pòezje òstôł Mateùsz Titës Meyer, chtëren wësłôł na kònkùrs ùsôdzk pt. „banë”:

Drëdżi plac miała Ana Swistun za wiérztã pt. „wòłanié wòdë”, a trzecy môl ùdostała Hana Makùrôt-Snuzëk za „Miono òrganizmù”.

W kategórii òpòwiôdanié abò esej pierszé place dobëlë doswiôdczony kaszëbsczi pisarze. Trzecy plac dobéł Adóm Hébel za dokôz „Krëszka”, drëdżi Grégór Schramke za „Skórã wilka”, a dobiwczką òstała Kristina Léwna za òpòwiôdanié „Szmata”.

W kategórii dokazów na binã nôlepszi – wedle karna òbsãdzëcelów – béł ùsôdzk pt. „Tandaradei!”, jaczégò aùtorã je Mateùsz Titës Meyer. Jegò tekst je baro rozbùdowóny, pòdzelony na dzewiãc zdrzadniów, a westrzód pòstacjów są m.jin.: Móńka Szréder (dochtorantka germanisticzi), Żbiétka „Pardwa” (atrakcyjnô ë òdważnô dochtorantka anielisticzi), Jack (fòrsz bëniel, dochtorant historie).

Drëdżi môl ùdostôl Mateùsz Szuba, chtëren napisôł tekst „W gòni za lësã”. Jegò pòkrziżawa dzeje sã w XIII wiekù, a herojama są m.jin. prësczi wiceméster Henrik von Honstein i kómtur chełmińsczi zemie Henrik von Merbitz.

Trzecy môl w kategórii dokazów na binã dostała Justina Pranszke. Do tradicjowégò òbrzãdu zrzeszonégò z Nowim Rokã dodała wiele ról i tekstów mòckò zrzeszonëch z dzysdniowòscą. W ji dokazu „Gwiżdże (nié) z tëch czasów” pòjôwiają sã taczé pòstacje jak: Cyfrizacjô, Inflacjô i Pòlarizacjô.

Winszëjemë òrganizatoróm (MKPPiM we Wejrowie) zrëchtowaniô XXV Òglowòpòlsczégò Lëteracczégò Kònkùrsu m. Jana Drzéżdżona, a przede wszëtczim dobiwcóm latosy edicje.

dm