Reklama

Szandara i radny z òbwiną ò kradélstwò

Klëka

24/01/2026 11:14

Print screen ze starnë https://czluchow.eu/

Jeden kòmis zgłosył ùkradzenié złoti narãcznicë. Szandarzë mùszelë zatrzëmac swòjégò drëcha z kòmendë.

Prokùratura w Człëchòwie òbwinowała jednégò chłopa ò to, że we wtórk dwadzestégò stëcznika z jednégò z kòmisów w Człëchòwie ùkrôdł złotą narãcznicã. Jegò łëp je wôrt piãc tësący dwasta złotëch. Ju pòstãpnégò dnia chłop béł przesłëchóny i przëznôł sã do winë. Dorazu do mediów doszła wiadã, że kradélc je szandarą, jaczi robi na krézowi kòmendze. Kòmendant ju rëgnął z pòstãpòwanim procëm swòjémù pòdrzãdnémù. Nôgwësni szandara stracy robòtã. Òkróm bëcô szandarą, òbskôrżony je téż nôleżnikã miesczi radzëznë. Do prowadnika radzëznë Mariusza Przëszlôka we czwiôrtk dwadzestégò drëdżégò stëcznika trafiło jedno pismiono òd samégò radnégò z rezygnacją z fùnkcje prowadnika kòmisje skargów, wniósków i peticjów, a drëdżé òd zarządzënë klubù radnëch „Kòżdi je Wôżny”, jaczé zawiesëło radnégò w prawach nôleżnika. Mariusz Przëszlôk dostôł téż wiadło, że òbskôrżony nie bãdze sóm gôdôł z mediama i kôże kòntaktowac sã ze swòjima prawnikama.

H.S.Sz.

Załączniki