Reklama

Szandara z Òchrónë Państwa zaatakòwôł rodzëznã nożã

Klëka

27/01/2026 12:52

Pòzdrzatkòwi òdjimk. Print screen ze starnë https://www.sop.gov.pl/

Jedna z òfiarów nie przeżëła, dwie są w cãżczi stojiznie. Atakòwnik miôł przeszłé wszëtczé psychòlogiczné badérowania.

Sztërdzescë sztërë lata stôri szandara ze Służbë Òchrónë Państwa béł wëjachóny z rodzëzną na ferie do starków do Ùstczi. Pół dzesąti w nocë w pòniedzôłk dwadzestégò szóstégò stëcznika pòlicjô dostała wiadã ò krzikach i biôtce w mieszkanim starszich jegò białczi przë Bôłtëcczi szasëje. Czej patról przëjachôł, mùszôł ùskrzëmic chłopa, chtëren nożã zaatakòwôł całą rodzëznã: białka, ji starszich, sëna i córkã. Pò cziledzesąt minutach reanimacje sztërëlatné dzéwczã ùmarło. Białka i ji mëmka trafiłë do bòlëcë w cãżczi stojiznie. Sënowi razã ze swòjim starkã ùdało sã ùceknąc z mieszkania, le téż bëlë reniony. Nie je wiedzec, dlôcze chłop zaatakòwôł. Służba Òchrónë Państwa dała do wiadë, że béł w służbie òd dwadzesce trzech lat, béł pirotechnikã w stãpniu majora i miôł wôżné wszëtczé brëkòwné badérowania, w tim psychòlogiczné. Zaczãlë procedurã zesztrëchniãcô mòrdarza ze służbë. Chłop stónie przed prokùratorã.

H.S.Sz.

Załączniki