Reklama

Tajka òdeckła w zarkù w krematorium

Klëka

26/11/2025 09:36

Pòzdrzatkòwi òdjimk. Phydoughx; zdrzódło: https://en.wikipedia.org/wiki/Wat_Bang_Phra#/media/File:Wat_Bang_Phra.JPG

Czedë rodzëzna dogadiwała, jak dostac ji akt skònu, białka zaczãła dawac znaczi żëcô.

W niedzelã dwadzestégò trzecégò smùtana w prowincje Phitsanulok brat jedny cãżkò chòri szescdzesątpiãclôtczi nalôzł jã bez znakù żëcô – scwierdzył, że nie òddichô. Włożił jã do zarkù i zawiózł do jedny z bòlëców w Bangkòkù. Próbòwôł spôłnic slédną wòlã swòji sostrë o przekôzanim òrganów na mediczné céle. Lékarze równak nie chcelë jich wëcyc, bò chłop ni miôł aktu skònu. Zawiózł jã tedë do bùddijsczi swiãtnicë Wat Rat Prakhong Tham pòd Bangkòkã, w jaczi prowadzoné je téż krematorium. Pòjachelë tam téż jiny krewny białczi. I tam sã òkôzało, że do ùroczëstégò spôleniô cała je brëkòwny akt skònu. Czej pòdwëższi ë skarbnik swiãtnicë Pairat Sudthup tłómacził chłopù, jak mòże taczi akt ùdostac, z zarkù narôz dało sã czëc letczé klepanié. Pòdwëższi kôzôł zark òdemknąc, a tam bëło widzec, że białka letkò òdmikô òczë i klepie w bòk trëmë. Zarô przewiezlë jã do bòlëcë. Tam lékarze pòcwierdzëlë, że krążenié ù ni nie bëło zatrzimóné, ale miała cãżką hipòglikemiã. Terô òstôwô pòd dozérã lékarzów, a pòdwëższi swiãtnicë zadeklarowôł, że sóm zapłacy za ji lékarzenié.

H.S.Sz.