To nie bëła zbiérnô jachta, le sztërë òsóbné

Nôleżnicë prozwierzëcy òrganizacje winëją jachtarsczé kòło ze Gduńska ò òbchôdanié przepisów.

Ùrząd Gminë Żukòwò dôł do wiadë, że òdwòłónô òstała jedna zbiérnô jachta w òbéńdze Pãpòwa, Lezna i Lnisków. W tëch môlëznach dzejô Jachtarsczé Kòło „TUR” ze Gduńska. Pò tim ògłosu òrganizacjô „Vena – inicjatiwa dlô zwierzãt” dała sã òpòwiedzec na swòjich spòlëznowëch mediach ò sytuacje ze czwiôrtkù piãtnôstégò stëcznika, jakô mògła miec z tim związk. Negò dnia dzejarze òrganizacje trafilë w lasu na terenie gminë Żukòwò jachtarza z gduńsczégò kòła. Béł z nim pies, a òn mierził flińtą w starnã lasu. Krzikelë do niegò, że w lasu są lëdze i mô nie strzelac. Jachtôrz nie pòdeszedł sã spëtac, kùli tëch lëdzy je i gdze dokładno są, le pòszedł głãbi w las. Aktiwiscë nalezlë pòd lasã aùtołë sztërzech jachtarzów zaparkòwóné pòd lasowim pamiãtnikã jich kòła. Kòl lasu nigdze nie bëło òstrzégów przed zbiérną jachtą, a wcyg bëło czëc wëpałë z flińtów. Aktiwiscë zazwònilë na pòlicjã. Szandarzë przëjachelë pòd las, a pò dostanim pòcwierdzeniô rzeklë aktiwistóm, że kòżdi jachtôrz mô zgłoszoné òsóbną jachtã, tej ni ma mùszu wëdawac zôkazów wlôżaniô do lasu. Jeden z pòlicjantów zazwònił do znajomégò jachtarza, chtëren wedle òrganizacje téż je szandarą. Czej nôleżnicë kòła wëszlë wëcmanim z lasu, pòkôzelë papiorë, a pòlicjô ùznała, że wszëtkò sã dzejô legalno. Rzeczniczka Kòmendë w Kartuzach Aleksandra Phillip pòcwierdzëła, że doszło do taczégò zdarzeniô, jachtarze bëlë wëlegitimòwóny, a szandarzë ni mielë zastrzégów. Nôleżnicë „Venë” wątpią równak w ùtcëwòtã jachtarzów, bò ti zaczãlë i skùńczëlë swòje apartné jachtë w jednym placu i całi czas bëlë ze sobą w łączbie. Wedle nich łowiecczé kòło chcało òbéńc przepisë przez zgłôszanié czile òsóbnëch jachtów miast jedny zbiérny, na co bë nót zgòdë z gminë.

H.S.Sz.