Reklama

Wëbùch pòd sądã w Pakistanie – dwa kraje pòdezdrzóné

Klëka

12/11/2025 10:03

Shehbaz Sharif; zdrzódło: https://pl.wikipedia.org/wiki/Shehbaz_Sharif#/media/Plik:Shehbaz_Sharif_in_2024.jpg

Wëszëznë w Islamabadze ùznałë zdarzenié za terroristiczny atak, ale nie są zgòdą, chto mógł jen zjiscëc.

We wtórk jednôstégò smùtana pòd bùdinkã sądu w Islamabadze, stolëcë Pakistanu, doszło do bómbòwégò atakù. Atakòwnik-sãzabijca z wëbùchòwima ladënkama miôł ùdbóné wësadzëc sã bënë sądu, ale ni mógł wlezc. Dlôte pòdeszedł do zaparkòwónégò pòd bùdinkã pòlicjowégò aùtoła i tam òdpôlił ladënk. Zdżinãło dwanôsce òsób, a dwadzesce bëło renionëch. Dorazu rëgnãła wëdowiédzô, żebë doznac sã, kògùm béł atakòwnik. Rozmajité teòrie pòdôł ju pakistańsczi rząd. Minister òbarnë Khawaja Asif wskôzôł na Talibów z Afganistanu i scwierdzył, że rząd w Kabùlu prowadzy aktiwną wòjnã na terenie Pakistanu. Przëbôcził jinszé ataczi pakistańsczégò partu Talibów w slédnëch latach, zanôleżnégò òd wëszëznów w Kabùlu. Premiéra Shehbaz Sharif za to rzekł, że atak béł jednym z nôgòrszich przëmiarów indijsczégò państwòwégò terrorizmù w regionie. Dokazów nie przedstawił. Tak Afganistan jak Indie òdrzucëłë òbwinë ò przeprowadzenié abò pòdskacenié do atakù. Niżódna jinszô grëpa, jakô dzejô w regionie, téż sã jesz nie przëznała.

H.S.Sz.