Do Swiónowa do Królewi Kaszub pielgrzimòwie bãdą sã schadac przez całą òktawã Wiôldżégò Òdpùstu.
W sobòtã dzewiãtnôstégò lëpińca we Swiónowie zaczął sã Wiôldżi Òdpùst, jaczi pòdérëje òsmë dni. Nôwicy pielgrzimów jak co rok zebrało sã w niedzelã. Pòkłón staniców i feretronów pòprzedzył mszã, jaką dlô wiérnëch pòzeszłëch z całëch Kaszub a téż dlô przedstôwców lokalnëch wëszëznów i Kaszëbskò-Pòmòrsczégò Zrzeszeniégò òdprawił pelplińsczi biskùp Riszard Kasyna. Na homilie wskazéwôł na Marëjã jakno na prowôdniczkã wiërnëch do dozdrzeniałoscë we wierze, za òdpòwiesc na drãgòscë bëcô chrzescëjanã w dzysdniowim swiece bédowôł żëcé redoscą Ewanielie, dzyrżczé dôwanié swiôdectwa i wiérnotã we wiôldżich a môłëch rzeczach, a téż pòdsztrichiwôł znaczenié swiãti mszë, zachãcywającë téż do pòdchôdaniô do chrzescëjańsczégò żëcégò jak do priwatny eùcharisticzny procesje, w chtërny to wiérny mô bëc mònstrancją ùkazéwającą Christësa jinym. W pòstãpné dni òktawë bãdą dni namienioné apartnym grëpóm pielgrzimów: w pòniedzôłk mòdlëc sã bãdą starszi z dzecama, we wtórk zakòchóny i zarãczony, we strzodã nôleżnicë religiowëch bractwów i stowôrów, we czwiôrtk kapłani, diakònowie i klericë, w piątk òbchôdający małżeńsczé jëbleùsze, w sobòtã gbùrzë z kartësczégò krézu, w niedzelã tczëcele Matczi Bòsczi Swiónowsczi, a pòniedzôłk mdze pòswiãcony na mòdlëtwã za ùmarłëch.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie