Lëdzóm nie ùwidzała sã ùdba mieszkanczi prowincje Liaoning na ùdostôwanié miãsa za darmôka.
W Chinach głosnô sã stała sprawa białczi z prowincje Liaoning, jakô przëgarinała do se tósze ze schroniszczów, a pòtemù je zjadała. Kòntaktowała sã ze schroniszczama przez internetowé kòmùnikatorë brëkùjącë pseùdonimù Zhixuan. Pitała sã, czë je mòżebnosc adoptowaniô za darmôka psów szukającëch dodomù, a téż gôdała, że bãdze sã nima richtich zajimac i przëjimac kòntrolné òdwiôdënë òd robòtników schroniszcza. Na taczi ôrt adoptowała blëżi nieòkresloną wielënã psów, le nicht do ni dodóm nie przëjéżdżôł. Timczasã białka pùblikòwała w Internece filmiczi, na jaczich warzëła psé miãso, sama je jadła abò pòdôwała swòji rodzëznie. Zawiadomionô pòlicjô pò przepitanim białczi pòcwierdzëła, że bëło to miãso prawie tëch psów, jaczé adoptowała ze schroniszczów. Chòc sprawiło to wiôldżé rozprzeniesenié ù dôwnëch òpiekùnów zjadłëch tószów, a pòwstało nawetka karno dzejarzów, chtërno nagłosniło całą sprawã, to nie je gwës, czë Zhixuan dostónie jaką sztrôfã – jedzenié pségò miãsa nie je w Chinach nielegalné, a pòlicjô pòdsztrichiwô, że mòże bëc drãgò dowiesc jaczich jinszich nadùżëców òb jich bicé.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie