Bùndestag mùszôł zmienic regùlamin, żebë pòwtórzec wtórkòwé welowanié i chùtkò mianowac nowégò kanclerza. Tak jesz w historie Federalny Repùbliczi Niemiec sã nie zdarzëło.
We wtórk szóstégò maja reno w niemiecczim Bùndestagù bëło welowanié pòsélców na nowégò kanclerza. Wikszoscowô kòalicjô Chrzescëjańskò-Demòkraticzny Ùnie, Chrzescëjańskò-Socjalny Ùnie i Socjaldemòkraticzny Partie Niemiec wëstawiła kandidaturã sétmëdzesątlatnégò Friedricha Merza, przédnika Chrzescëjańskò-Demòkraticzny Ùnie. W pierszim welowanim nie dostôł brëkòwny wikszosce głosów – zafelowało jich szesc. Znaczi to, że part pòsélców z kòalicje na niegò nie welowôł. To béł pierszi taczi przëtrôfk w pòwòjnowi historie Niemiec. Wedle regùlaminu Bùndestagù pòstãpné welowanié mògłobë bëc zrëchtowóné dopiérze za trzë dni, ale w czile gòdzyn rządzącô kòalicjô dogôdała sã z partią Zelonëch i Lewizną, żebë zmienic regùlamin i przeprowadzëc welowanié jesz rôz. Terô Merz ju dostôł wikszosc i przëjął ùrząd kanclerza. Złożił przësëgã i òdebrôł akt nominacje òd prezydenta Franka-Waltera Steinmeiera. Friedrich Merz ùrodzył sã w Nadrenie–Nordowi Westfalie. Je nôleżnikã swòji partie òd piãcdzesąt trzech lat. Lëdze gò mają za gòspòdarczo liberalnégò kònserwatistã. Béł znóny jakno òddóny dzejôrz Chrzescëjańskò-Demòkraticzny Ùnie i kritik migracjowi pòliticzi Angelë Merkel. Je żeniałi, mô trójkã dzecy i je katolikã.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie