Pò zabicym swòji òfiarë sprôwca miôł zwiornąc do lasu i spróbòwac samémù ze sobą skùńczëc. Nalazłégò zabrelë do bòlëcë.
We strzodã dwadzestégò piątégò czerwińca w Bòjanie w gminie Szëmôłd przechôdający swiôdk zmerkôł w zaparkòwónym aùtole cało dwadzescetrzëlatny białczi. Wezwóné służbë scwierdzëłë, że białka òstała zażgónô nożã. Aùtół i môl jegò nalézeniô òstałë zabezpieczoné, a pò wëtipòwanim znónégò ju szandaróm pòdezdrzónégò, rëgnãła szëkba, z ùżëcym czile karnów kriminalny pòlicje i dzélu prewencje, jaczé wëzwëskiwałë midzë jinszima dronë i pòdszukòwné psë sprowadzoné ze Gdinie i z Chòniców. Zablokòwóny béł téż part dróg w regionie. Pòdezdrzónégò ùdało sã nalezc w jednym lôskù. Béł nieprzëtomny i miôł kòl se nóż, jaczim nôgwësni zabił òfiarã. Nieòficjalno je wiedzec, że próbòwôł sóm ze sobą skùńczëc i że miôł kłóté renë. Òstôł zabróny helikòpterã do bòlëcë. Służbë ani prokùratura nie dałë do wiadë, kògùm je pòdezdrzóny. Mòtiwë mòrdarstwa jesz òstóną zbadérowóné.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie