Ùmarłi chcôł bëc pòchòwóny w bazylice Matczi Bòsczi Wikszi, bùten grańców Watikanu. Na òddzãkòwanié z nim zjachało sã co nômni sztërësta tësący lëdzy.
W sobòtã dwadzestégò szóstégò łżëkwiata ò gòdzënie dzesąti przed pôłnim w Rzimie zaczãła sã pògrzebòwô mszô ùmarłégò w jastrowi pòniedzôłk papieża Francëszka. Zark Òjca Swiãtégò òstôł pòstawiony przed wôłtarzã na Placu Swiãtégò Piotra. Na ten zeszło sã kòl dwasta piãcdzesąt tësący lëdzy. Òkróm wiérnëch zjachelë sã téż wódcë państwów, przedstôwcowie królewsczich rodzëznów i religiów chrzescëjańsczich a niechrzëscejańsczich, midzë jinszima prezydencë Argentinë, Italsczi, Pòlsczi, Ùkrajinë, Zjednónëch Stanów, Francje, szefòwô Eùropejsczi Kòmisje, przédny rabin Rzimù, królowie i królewé Belgów, Dëńsczi, Szpańsczi, Szwédzczi a Jordanie. W związkù z taczima delegacjama watikańsczé ë italsczé służbë ùrëszniłë nadzwëkòwé strzódczi bezpiekù. Wëgłôszający homiliã kardinał Giovanni Battista Re pòdrechòwôł pòntifikat i nôùkã Francëszka. Pòdsztrichiwôł, jaczé znaczenié miała dlô niegò redosc ewanielie i miłoserdzé, jak baro dzejania papieża miałë na célu zblëżenié sã do kòżdégò człowieka, a téż ò jegò pòzdrzatku na Kòscół jakno na lazaret i dodóm dlô wszëtczich. Pò mszë zark z całã Francëszka òstôł przewiozłi szasëjama Rzimù bùten Watikanu do Bazyliczi Matki Bòsczi Wikszi, gdze papiéż zechcôł bëc pòchòwóny. Na drodze przejazdu bëło pòstãpné sto piãcdzesąt tësący gòscy. W priwatny ceremònie pòd przédnictwa kardinała Kevina Farrella zark òstôł złożony do zemi kòl kaplëcë Matczi Bòsczi. Na prostim nôgróbkù pòłożëlë kamianną platã z łacyńsczim nôdpisã „Franciscus”. Ùroczëzna skùńczëła sã kòl wpół do drëdżi pò pôłnim.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie