Reklama

Warszawiôk pòdpôlił krôm w Lãbòrgù

Klëka

31/05/2025 18:04

https://lebork.policja.gov.pl/pm7/informacje/wiadomosci/145372,Podpalil-palety-pod-sklepem-w-Leborku-i-odjechal-pociagiem-do-Warszawy-Ogniem-za.html

Dzãka wespółrobòce lãbòrsczich i warszawsczich szandarów ùdało sã ùstalëc, że chłop jadący bez bilietu baną z Lãbòrga do Warszawë je sprôwcą szkòdów za szescdzesąt piãc tësący.

We wtórk dwadzestégò sódmégò maja wieczór do jednégò krómù przë szasëje Hérojów Monte Cassino przëszedł trzedzescëdzewiãclatny chłop z Warszawë. Béł spiti i prosył krómòwą, żebë przechòwała mù bagaż. Czej ta òdmówiła, naczął trzôskòwac, wëlôł kawã i krzikôł, za co wezwóny szandarzë wëstawilë mù sztrôfë ò parłãczny wôrtnoce tësąc sto złotëch. Chłop pòtemù pòszedł na banowiszcze i wsôdł w banã do Warszawë, le zarô za miastã mùszôł wësadnąc, bò ni miôł bilietu. Wrócył nocą piechti do Lãbòrga pòd ten sóm króm, w jaczim szkalowôł na kòmijkã, a tej pòdpôlił stojącé kòl niegò paletë i plastikòwé kastë, nôgwësni z pòmstë. Òdżin zajął òkna i elewacjã bùdinkù, sprôwiającë szkòdë na szescdzesąt piãc tësący złotëch. Sprôwca zwiornął, a òdżin chùtkò ùgasëlë ògniarze, dzãka czemù płomienie nie dostałë sã bënë. Warszawiôk wsôdł do pòstãpny banë do Warszawë, wcyg bez bilietu, le tą razą banszandara gò nie wërzucył – miast tegò dôł ò nim znac pòlicje, jakô w Warszawie żdała na niegò na banowiszczu. Warszawskô pòlicjô bëła w łączbie z lãbòrską, dzãka czemù ùdało sã pòcwierdzëc, że zatrzimóny béł sprôwcą pòdpôleniô. Grozy mù do piãc lat sôdzë.

H.S.Sz.

Czytaj nas w Google

Dodaj do Google

Źródło i opracowanie własne