Co? Dze? Czedë? [13.11-18.11.2024]

Gmina Somònino razã z Fùndacją Rozwiju Lokalny Demòkracje rôczą na darmòwé szkòlenié dlô zainteresowónëch dzejanim i fùnksnérowanim Kòłów Gòspòdëniów Wiesczich, jaczé mdze 13 smùtana w gòdzënach  4 pp. –8 wieczór (16:00–20:00) w kònferencyjny zalë Ùrzãdu Gminë w Somòninie. Na pòtkaniu dowiéta sã ò fòrmalnoscach sparłãczonëch z ùsôdzanim KGW a tikającëch sã jegò dzejaniô.

Wicy na: https://expresskaszubski.pl/pl/11_wiadomosci/60605_somonino-chcesz-zalozyc-kgw-lub-zdobyc-na-nie-dotacje-wkrotce-szkolenie.html

Centrum Eùropejsczich Pòtkaniów „Światowid” w Elbingù rôczi na kònferencjã pòd titlã „Drugie życie zdigitalizowanych zbiorów”, jaczé przërëchtëje w dniach 14-15 smùtana przë sz. Jagielończika 1. Mdze na ni gôdka nié blós ò digitalizacje, le téż ò kùlturowi spôdkòwiznie w sparłãczenim z dizajnã, nowima technologiama a turistiką.

Mòże parłãczëc te òbrëmia? Gdze je plac, w jaczim mògą pòtkac sã zabëtczi z nowima technologiama? Jak turisticzny dzél kòrzistô z aplikacji przërëchtowónëch bez mùzea i jinszé institucje? To leno niechtërne z pitaniów, jaczé òstóną zadóné òb czas kònferencje.

Wicy na: https://drugiezyciezdigitalizowanychzbiorow.my.canva.site/

Part Kaszëbskò-Pòmòrsczégò Zrzeszeniô w Jastarnie rôczi na pòtkanie ze Sławiną Kòsmùlską, jaczé mdze 15 smùtana ò piąti pò pôłnim przë sz. Pòrtowi 43. Zéńdzenié mdze tëkac sã ksążczi pòd titlã „Myśl polityczna Lecha Bądkòwsczégò”, jaką mòże kùpic òb czas ti rozegracje.

„Myśl polityczna Lecha Bądkowskiego" to kómpendium pòliticzny pùblicysticzi Bądkòwsczégò, òd jegò pierszich ùdbów pò wëpòwiedzë ze slédnëch dniów żëcégò. Tekstë te razã pòkazëją kònsekwencjã głoszonëch bez Lecha Bądkòwsczégò przekònaniów.

Òkróm tegò w òbrëmim wëdarzeniô mdze wprowadzenié do pòtkaniô bez dra Mirosława Kùklika, projekcjô filmù „Kryptonim Inspirator” H. Dobòsza, diskùsjô a pòczestënk.

Wicy na: https://fb.me/e/8xRqROwSl

Mùzeùm Kaszëbskò-Pòmòrsczi Pismieniznë i Mùzyczi we Wejrowie, Kaszëbsczi Institut we Gduńsku ë Doktorskô Szkòła Pòmòrsczégò Ùniwersytetu w Słëpskù rôczą 15 smùtana do Wejrowa na Kaszëbsczé Sympòzjum pòd titlã „Wielka Wojna (1914-1918) na Kaszubach". Mdą tam żdac na naju sztërë wëkładë na tã témã i òtemkniãcé òdjimkòwégò wëstôwkù.

Wicy na: https://fb.me/e/7BuNwyqNb

Mùzeùm – Kaszëbsczi Etnograficzny Park miona Tédorë i Jizydora Gùlgòwsczich we Wdzydzach rôczi na òtemkniãcé wëstôwkù pòd titlã „Uratowane od nieistnienia – pomorskie pojazdy konne – kontynuacja". Wernisaż mdze w piątk, 15 smùtana ò dwanôsti w pôłnié.

Wëstôwk je brzadã projektù, jaczi mô za cél kònserwacjã pòstãpnëch szesc kònnëch pòjazdów pòchòdzącëch z Pòmòrzô, z kùńca XIX wiekù i zôczątkù XX wiekù, chtërne dołączą do karna òsmë ju pòddónëch kònserwacje.

Całą kòlekcjã 23 pòjazdów twòrzi karno zesadzóné z saniów, briczków, fùrmanków, robòcëch wòzów, transpòrtowëch brików, mlécznëch wòzów i jinszich pòjazdów.

Wicy na: https://fb.me/e/4fs51QoY4

Òbchòdë 70-lecô Archeòlogiczno-Historicznégò Mùzeùm w Elbingù pòmalë sã kùńczą i z ti leżnoscë elbińskô institucjô kùlturë rôczi na kònferencjã pòd titlã „Tożsamość miasta. Elbląg 1954-2024”, jakô mdze 16 smùtana ò dzesąti do pôłniô w zalë A/01 Stôromiesczégò Rôtësza w Elbingù przë sz. Stôri Rënk 25.

Roczëznë to cząd refleksje, tej je to leżnosc, żebë pòspólno pòmëslec nad zmianama, jaczé zaszłë w Elbingù bez slédné sëtmë dekadów – co sã ùdało zrealizowac i z czegò mieszkańcowie mają prawò bëc bùszny.

Wicy na: https://fb.me/e/2qYp8Fad2

Ju 16 smùtana w Spòdleczny Szkòle nr 7 miona Jana Karnowsczégò w Chònicach mdze nôwiãkszi kònkùrs kaszëbsczi òrtografie – Kaszëbsczé Diktando „Królewiónka w Pałacu”.  Na rozegracjô cëszi sã òd lat wiôldżim ùznanim, tej przëcygô rok w rok nawetka do czileset bëtników. W kònkùrsu mògą wząc ùdzél szkòlôcë ze spòdlecznëch i wëżispòdlecznëch szkòłów. Apartné kategórie są téż dlô dozdrzëniałëch, profesjonalistów a szkólnëch kaszëbsczégò jãzëka. To nié blós leżnosc do sprôwdzeniô swòjich ùmiejãtnosców w pisanim, le téż je to bëlnô zôbawa, òb czas jaczi czekô na waju wiele atrakcjów, warkòwniów, wanogów a kòncertów.

Wicy na: https://fb.me/e/dxN8VH6va

Dzél Etnografie Nôrodnégò Mùzeùm we Gduńsku rôczi 17 smùtana ò jednôsti do pôłniô na cykl szesc krótczich dokùmentalnëch filmów pòd titlã „TRACE. Traditional Arts and Crafts of Europe | Tradycyjna sztuka i rzemiosło Europy”, jaczé prezentëją tradicyjné artisticzné rzemiãsło a téż lëdowëch artistów z Pòmòrzégò. Aùtorã filmù je Jón Rusek.

Na rozegracje mdą herojowie a herojczi filmów, jak i sóm reżiséra. Zéńdzenié mdze leżnoscą do gôdczi ò pasje, jakô staje sã dzélã żëcégò.

Wicy na: https://fb.me/e/28zmujQrc