Co? Dze? Czedë? [17.01-19.01]

Gminowi Òstrzódk Kùlturë, Spòrtu i Rekreacje z Lëpùsza rôczi na turniér baszczi – nôbarżi znóny kartowi jigrë na Kaszëbach. Turniér rozegróny mdze w piątk 17 stëcznika w sedzbie òrganizatora kòl sz. Młińsczi 12. Zôczątk zapisów ò gòdz. czwiôrti pò pôłnim, a gòdzënã pózni mdze start rozgracje. Òb czas turniéru mdze prowadzonô apartnô klasyfikacjô dlô kòżdégò bëtnika. Ùdzél w miónkach kòsztô 10 zł.

Mùzeùm Westrzédnégò Pòmòrzô w Słëpskù, Mùzeùm w Lãbòrgù razã z Wëdowizną Jasne rôczą na promòcjã ksążczi aùtorstwa Eddy Gutsche pòd titlã „"Malarze, miejscowości i widoki Pomorza Zachodniego w pierwszej połowie XX wieku. Część 3". Rozegracjô bãdze 16 stëcznika ò gòdz. piąti pò pôłnim w Mùzeùm w Lãbòrgu kòl sz. Młinarszczi 14-15, a 17 stëcznika ò ti sami gòdzënie w Biôłim Szpikrzu kòl sz. Biôłëch Régów 12.

Ksążka wëdónô je dwajãzëkòwò – pò pòlskù a miemieckù. Ùdzél w zéńdzeniach je darmôk!

Szlachòwno jak w dwùch wczasnëch tòmach aùtorka prezentëje w swòji pùblikacje mni abò barżi znónëch artistów, jaczi pòchòdzą z Pòmòrzégò abò tuwò żëlë i twòrzëlë. Na 200 starnach zbògaconëch ilustracjama przedstôwiô 13 artistów i jednã artistkã, jaczich kùnsztowné dzejanié ùwieczniło snôżé krôjmalënczi Pòmòrsczi przódë lat.

Ksążka mòże kùpić òb czas rozegracjów, a téż w pòwrózkù niżi:

https://www.wydawnictwo-jasne.pl/publikacje.php5

Dzãka szôłtësowi i szôłtëstwù Tëpadłów – z leżnoscë òbchòdzonégò łoni jëbleùszu 800-lecô pierszi, historiczny zmiónczi ò ti wsë – òstôł wëdóny ji mònograficzny albùm pòd titlã „Osiem wieków nadmorskiej wsi Tupadły 1224–2024” aùtorstwa dra Mirosława Kùklika. Aùtorsczé pòtkanie òdbãdze sã 17 stëcznika ò gòdz. piąti pò pôłnim w Willi Global kòl sz. Makòwi 12 w Tëpadłach.

Pùblikacjô tikô sã ùszłotë Tëpadłów jak i ji dzysdniowëch dzejów a zwëków mieszkańców. Wiôldżim partã ksążczi są òdjimczi, co pòchòdzą z familiowëch albùmów lëdzy, co czedës abò jesz tuwò żëją.

Pùblikacjô òsta ùdëtkòwionô bez Gminã Wiôlgô Wies.

https://wladyslawowo.pl/wiadomosci/1/wiadomosc/233969/tupadly_800_lat_historii_ktora_pisze_sie_dalej__spotkanie_autors

W sobòtã 18 stëcznika w Kaszëbsczim Mùzeùm w Kartuzach bãdze Swiãto Złotnicë a wernisaż wëstôwkù pòd titlã „Benedyktyńska robota”. Rozegracjô je przërëchtowónô we wespółrobòce z karnã wësziwkù „Tulpa” z Wejrowa, karnã „Siedem Kolorów”, co dzejô przë gduńsczim parce KPZ, i Danutë Niechwiadowicz. Wëstôwk mòże òbzerac do 25 séwnika tegò rokù.

Wicy na: https://kartuzy.info/artykul/kartuzy-swieto-zlotnicy-n1662759

18 stëcznika ò piąti pò pôłnim mdze premiera nowégò filmù Béatë Hincke pòd titlã „Drëszk”, jakô je slédnym dzélã kaszëbsczi trilogie („Manteltréger” i „Zgniélc”). Film bãdze nié blós kòmedią, le téż pòjawi sã w ni kriminalny wątk. W filmie ùdzél biorą miészkańcowie nordowëch Kaszëb, m.jin. z Gniéżdżewa, Chłapòwa, Strzelëna a Nôdolô.  Rôczimë w tã sobòtã do hale Spòdlëczny Szkòłë kòl sz. Władisławòwsczi 87 w Chłapòwie. Wstãp je darmôk!

Na gòdowi ôrt mòżeta wcyg bawic sã w rozmajitëch môlach na Kaszëbach jesz do 21 stëcznika z duetã Werónika Kòrthals i Paùel A. Nowak. Jich interpretacje pòlsczich i
kaszëbsczich melodiów są fùl emòcjów i głãbòczégò òddaniô, dzãka czemù mòże pòczëc nôstrój Gòdów. W tim tidzeniu kòncertë mdą 18 stëcznika w Miechùcënie (kòscôł pw. sw. Wòjcecha i sw. Brata Alberta Chmielowsczégò) ò piąti pò pôłnim a 19 stëcznika w Lëpińcach (kòscôł pw. Jasnogòrsczi Królewi Pòlsczi) kòl pierszi pò pôłnim zarô pò swiãti mszë.
„Nad Kaszëbama gòrô gwiôzda” to nié blós titel kòncertowégò cyklu, le téż nônowszi platczi, jaką artiscë mdą promòwać òb czas swòjich rozegracjów.

W niedzelã 19 stëcznika òdbãdą sã swiãté msze z kaszëbską liturgią słowa z ùdzélã karna „Kaszubki” z Chwaszczëna: ò gòdz. trzecy pò pôłnim w kòscele pw. sw. Apòsztołów Szëmòna i Judë Tadeùsza w Chwaszczënie ë ò gòdz. szósti pò pôłnim w kòscele pw. sw. Pòlikarpa Biskùpa Mãczelnika we Gduńskù.

Przër. Paùel Wiczińsczi