Co? Dze? Czedë? [20.02-22.02.2025]

Jes të lubòtnikã kaszëbsczégò jestkù abò chcesz dopiérze pòznac, jaczé szmaczi mają/miałë górã na Kaszëbach? Dlô Ce gwësno je rozegracjô, jaką òd lat rëchtëje Kaszëbskò-Pòmòrsczé Zrzeszenié pòd titlã „Kaszubska Bitwa Kulinarna”. Òb czas wëdarzeniô trzë karna (latos mdą to grëpë reprezentëjącé partë KPZ: Gòra, Réda i Żukòwò) mdą miec za zadanié przëszëkòwac w 90 minut trzë môltëchë, chtërne nôbarżi mdą szmakac kònkùrsowémù juri. Le nié blós òbsãdzëcelóm, bò gòsce téż mdą miec leżnosc sprobòwac jedzeniô. 

Rozegracjô mdze 20 gromicznika ò trzecy pò pôłnim w Szkòłowò-Wëchòwawczim Òstrzódkù we Wejrowie, kòl sz. Sobiesczégò 277 C.

Pòj, òbôcz a szmakôj Kaszëbë!

***

Centrum Zaangażowónëch Badérowaniów nad Kùlturową Cągłoscą sertno rôczi na promòcjã ksążczi „Dzieje Kaszubów/Dzeje Kaszëbów” aùtorstwa Michała Hinca i Adama Lubòcczégò wëdóné bez Kaszëbskò-Pòmòrsczé Zrzeszenié. Wstãpné słowò tikającé sã nowi wëdowiznë wëpòwié Tomôsz Wislicz z Institutu Historie PAN, a kôrbiónkã pòprowadzy Artur Jabłońsczi.

Rôczimë 20 gromicznika ò pół sódmi pò pôłnim do kònferencyjny zalë kòl sz. Dobri 72 na Wëdzélu „Artes Liberales” Warszawczégò Ùniwersytetu.

Pùblikacjô òpisejë nôwôżniészé wëdarzenia z pòzdrzatkù dzejów Kaszëbów. Nie je to pòliticznô historiô, bò panownicë, wòjnë i tzw. wiôlgô pòlitika pòjôwiają sã leno jakno spòdlé do pòkôzaniô kawlów spòlëznë. Nie je to historiô Kaszëb, a jich mieszkańców. Spòlëznowô historiô je blëższô òdbiércóm, bò tikô òna czësto najich przódków, jich żëcégò, jiwrów, redotë, jiscënków. W taczi fòrmie ùdostónô je zamkłosc pùblikacje.

***

Mùzeùm Kaszëbskò-Pòmòrsczi Pismieniznë i Mùzyczi we Wejrowie sertno rôczi na LXXXII kòncert z cyklu „Spotkania z muzyką Kaszub” pòd titlã „Procëm nocë”. Wëdarzenié mdze w piątk 21 gromicznika ò szósti pò pôłnim w sedzbie wejrowsczégò mùzeùm kòl sz. Zómkòwi 2 a. Wstãp je darmôk.

Prowadną mëslą kòncertu je noc, jakô je rozmajice traktowónô bez pòetów a kómpòzytorów z Pòmòrzégò. W programie wieczoru mdą sztërë rzôdkò wëkonywóné cykle piesniów: ùsôdzczi ze zbiéru „Lecë, chòrankò (1980) Jana Trepczika, piesnie z „Kaszëbskjégò pjesnjôka” (1935) téż aùtorstwa Trepiczka w twórczim òprôcowanim Władisława Walentinowicza (1948), cykl piesniów Henrika Jabłońsczégò ze zbiéru „Gromicznik” (1974) do słów Alojzégò Nôgla a cykl piesniów Witosławë Frankòwsczi (2005) do słów Jerzégò Stachùrsczégò. Wëkònôwcama mdą młodi adepcë wókalnégò kùńsztu sparłãczony z Wòkalno-Aktorsczim Wëdzélã a Doktorską Szkòłą Mùzyczny Akademie miona Stanisława Mòniuszczi we Gduńskù, sztudérzë a absolwencë Instrumentalnégò Wëdzélu a wëkładowcë.

***

Łoni òd 13 gòdnika jaż do 30 séwnika latoségò rokù mòże zwiedzac wëstôwk pòd titlã „Chełmowskiego świat wyobrażony” przërëchtowóny bez Òddzél Etnografie Nôrodnégò Mùzeùm we Gduńskù. Òkróm tegò 22 gromicznika ò dwanôsti w pôłnié w sedzbie òrganizatora kòl sz. Cystersów 19 je mòżebnosc òdkriwaniô ùtwórstwa Józwë Chełmòwsczégò razã z wespółkuratórką dr Małgòrzatą Dubasewicz. Ùdzél w wëdarzenim kòsztô tëli, co zwëkłi wstãp na wëstôwk.

Wicy na: https://fb.me/e/5n8ZNg5ot

***

Gardowi Òstrzódk Spòrtu i Rekreacje w Rëmie rôczi na turniér baszczi ò nôdgrodã bùrméstra gardu Rëmiô, jaczi mdze 22 gromicznika ò dwanôsti w pôłnié kòl sz. Adama Mickewicza 49. Òb czas turniéru mdze prowadzonô grëpòwô a apartnô klasyfikacjô dlô kòżdégò bëtnika.

Kaszëbskô Baszka to nôbarżi znónô kartowô jigra na Kaszëbach a Pòmòrzim, a ji pòpùlarnosc sygô téż jinszich òbrëmiów Pòlsczi, taczich jak Wiôlgòpòlskô a Szląsk. Gôdô sã, że pòwsta pòd kùńc XIX wiekù, równak nicht tak pò prôwdze nie je w sztãdze pòwiedzec, òd czedë na Kaszëbach cëskô sã w baszkã i chto ùsadzył regle ti jigrë.

***

Baro czekawô pòdjimizna mdze żdac na naju w Chmielnie – Festiwal Dialogù Kùltur miona Róberta Gembala, jaczi mdze 22 gromicznika w Gminnym Òstrzódkù Kùlturë, Spòrtu i Rekreacje kòl sz. Pòmòrsczégò Grifa 20. Przédnym célã festiwalu je pòdskôcanié apartnëch kùltur, latos – japóńsczi i kaszëbsczi.

Rozegracjô mô w programie m.jin. pòkôzk filmù „Kaszubskie nuty”, wëkładë a wëstôwczi ò kaszëbsczi temiznie.

Wicy na: https://kartuzy.info/artykul/chmielno-festiwal-dialogu-n1673100