Co? Dze? Czedë? [25.11-30.11.2024]

Pòstãpnô môłô tatczëzna doczekô sã swòji ksążczi! A to dzãka wiôldżi robòce ks. Sebastiana Wòzniaka pòd titlã „Historia wioski nad Bukowiną”, jakô òpòwiôdô ò ùszłoce Łësniewa Serakòwsczégò do 1900 rokù. Na mònografiô ni ma bëc blós historiczną wëdowizną, le téż służëc bùdowaniu lokalny juwernotë. Promòcjô pùblikacje ju 25 smùtana piãtnôsce pò czwiôrti pò pôłnim (16:15) w Kòscele w Łësniewie. Art.isticzny dzél przërëchtowóny mdze w môlowi spòdleczny szkòle ò piąti pò pôłnim.

Aùtórka „Welewetczi”, Stasza Bùdzysz, przëjedze do Torunia na rôczbã Etnograficznégò Mùzeùm miona Marie Znamierowsczi-Pfüfferowi i môlowégò partu Kaszëbskò-Pòmòrsczégò Zrzeszeniô. Kôrbiónkã ò ji ksążce a pòzdrzatkù na Kaszëbë pòprowadzy Michôł Targòwsczi 25 smùtana ò piąti pò pôłnim w widzawiszczowi zalë mùzeùm przë sz. Wały gen. Sikorskiego 19. Wstãp darmôk.

Wicy na: https://fb.me/e/7mGvbsDZ8

Wiôldżé artisticzné wëdarzenié mdze miec plac 26 smùtana ò dzewiąti do pôłniô w Kartësczim Centrum Kùlturë. Tuwò zbierzą sã dzecë i młodzëzna z karnów piesnie i tuńca kartësczégò krézu. Nen przezérk ùtwórstwa mô za cél rozkòscérzanié kùlturë i tradicje Kaszub, pòdskôcanié młodëch ùtwórców do ùlepsziwaniô swòjich spòsobnosców a naùczaniã kaszëbsczégò jãzëka w czekawi fòrmie.

Wicy na: http://www.sp2.kartuzy.pl/

Jeżlë chcesz pòznac pòmòrsczé tradicje i zwëczi, jaczé są zapisóné na Krajewi Lësce Niematerialny Kùlturowi Spôdkòwiznë, to gwësno mùszisz przińc 27 smùtana ò piąti pò pôłnim do Mùzeùm Westrzédnégò Pòmòrzô w Słëpskù. Pòtkanié na tã témã pòprowadzy kùstosz mùzeùm Éwa Mazur w wernisażowi zalë Biôłégò Spikrza.

Wëżi wspòmnióną lëstã prowadzy Minister Kùlturë i Nôrodny Spôdkòwiznë we wespółrobòce z Nôrodnym Institutã Spôdkòwiznë. Pòmòrsczé Wòjewództwò mô 8 wpisënków, m.jin. carillonową mùzykã we Gduńskù, kaszëbsczi wësziwk a zwëk Sobótczi w Jastarnie.

Wicy na: https://fb.me/e/3YsGPxoup

Ò kaszëbczi edukacje ùczëjëmë w òbrëmim przërëchtowóny bez projekt Etnotank debatë, jakô mdze miec plac na Filologicznym Wëdzélu Gduńsczégò Ùniwersytetu (zala 034 w bùdinkù Neòfilologie przë sz. Wita Stworsza 51) 28 smùtana ò piąti pò pôłnim. Na wëdarzenim mdze przedstôwióny wstãpny rapòrt do ewaluacyjnégò badérowaniô ò kaszëbsczi jãzëkòwi edukacje. W kôrbiónce na jegò témã mdze brac ùdzél prof. Cezari Òbracht-Prondzyńsczi, Wòjcech Kònkel, Werónika Mierzwińskô ë Jiwóna Makùrôt. Rozmòwã pòprowadzy dr Justina Pòmierskô. Wëdarzenié mòże òbzerac online (https://bit.ly/3YOB5my).

Mùzeùm Pùcczi Zemie miona Floriana Cenôwë rôczi na wernisaż projektu pòd titlã „Wirtualne Muzeum Rybackie Józefa Budzisza”, jaczi òdbãdze sã 28 smùtana ò szósti pò pôłnim we wëdzélu „Szpitalik” przë sz. Wałowa 11 w Pùckù.

Je to ùdba, jakô mô za cél pòkazac pòstacjã zasłużonégò pùcczégò rëbôka Jòzwë Bùdzysza. Dlôte òstôł stwòrzony wirtualny rum, jaczi mô bëc placã, w chtërnym kòżdi (niezdrzącë òd tegò, gdze je) mòze òbezdrzec i pòznac Bùdzysza.

Wicy na: https://fb.me/e/5UjyXy7Y6

30 smùtana ò piąti pò pôłnim w zalë „Warszawa” Gdińsczégò Filmòwégò Centrum mdze multimedialné widzawiszcze pòd titlã „Agora Mędrców – My Niewidzialni", jaczé tikô sã cëskù pòlsczi emigracje na kùlturã, kùńszt a gòspòdarkã Miemców i pòlskò-miemiecczich relacjów a téż òpòwiôdô ò tim, co parłãczi òbëdwa nôrodë. Wëstrzód rôczonëch gòsców mdze Danuta Stenka, jakô przeczëtô pò kaszëbskù dzéle ksążczi prof. Petera Olivera Loewa. Rozegracjô mdze téż do òbôczeniô na YouTube. Wstãp je darmôk.

Do kuńca 30 smùtana mòże wësełac prace w filmòwim kònkùrsu dlô dzecy pòd titlã „„Filmowa podróż po Muzeum. Dziecięce wizje” przërëchtowónym bez Mùzeùm Kaszëbskò-Pòmòrsczi Pismieniznë i Mùzyczi we Wejrowie. Kònkùrsowim zadanim je zrobieniô krótczégò filmù ò wejrowsczim mùzeùm, a fòrmë mògą bëc rozmajité – òd repòrtażu pò animacjã!

Wicy na: https://fb.me/e/4VGh0MwvV