Co? Dze? Czedë? [30.06-6.07]

Mùzeùm Kòscersczi Zemie miona Jerzégò Knybë rëchtëje wëstôwk, jaczi tikô sã jednégò z symbòlów kaszëbsczi kùlturë – łubiańsczi pòrcelanë. 30 czerwińca ò piati pò pôłnim mdze òtemkniãcé wëstawë „Porcelana w kolorach Kaszub. 50 lat porcelany kaszubskiej z Zakładów Porcelany Stołowej Lubiana w Łubianie (1975–2025)” w sedzbie kòscérszczégò mùzeùm kòl sz. Rynek 9.

Òb czas wëdarzeniô mòże òbzerac pòpùlarné dokazë z łubiańsczi fabriczi, a téż wërobiznë rzôdkò widzóné, ùnikatowé.

Wëstawa „Porcelana w kolorach Kaszub” to nié blós prezentacjô fòrmów i dekòracjów, le przede wszëtczim kôrbiónka ò lëdzach – projektantach i malarzach, zwëkłëch ùżëtkòwnikach i kòlekcjonerach, ò tëch, dlô chtërnëch kaszëbskô pòrcelana je dzélã codniowòscë, i ò tëch, jaczi zrobilë z ni ôrt pòkôzaniô miłotë do regionu.

Wëdarzeniu towarzą warkòwnie zdobieniô pòrcelanë dlô dzecy a młodzëznë – kòżdi z bëtników mdze miec leżnosc do ùtwórczégò zaprojektowaniô gwôsnëch dekòracyjnëch mòdłów. Zajme rëgną ju ò pół sódmi pò pôłnim.

***

We strzodã 2 lëpińca ò szósti pò pôłnim w Miesczi i Krézowi Pùbliczny Bibliotece miona Janusza Żurakòwsczégò w Kartuzach mdze zéńdzenié ze Staszą Bùdzysz – repòrtérką, filmòznajôrką, dolmaczérką, pòdkasterką a gazétniczką. Je òna absolwentką pòlsczi a rusczi filologie na Gduńsczim Ùniwersytece i Pòlsczi Szkòłë Repòrtażu. W 2019 rokù zadebiutowa repòrterską ksążką „Pokazucha. Na gruzińskich zasadach”. Dzysdnia nôbarżi je znónô ze swojégò repòrtażu pòd titlã „Welewetka. Jak znikają Kaszuby”. Òsoblëwie ò ti slédny pùblikacje kôrbiónkã pòprowadzy Tomôsz Słomczińsczi.

***

Òd 3 lëpińca jaż do 28 zélnika mòże wząc ùdzél we Czwiôrtkòwëch Targòwiszczach, jaczé òrganizëje Gminowi Òstrzódk Kùlturë, Spòrtu i Rekreacje w Chmielnie. Òd 10 dp do 2 pp (10.00–14.00), w kòżdi czwiôrtk, rôczimë do przińdzeniô na parking kòl sz. Pòmòrsczégò Grifa 28A, gdze pòtkôta stojiszcza lëdowëch artistów ze swòjima wëjątkòwima wërobiznama a téż Kòłów Wiesczich Gòspòdëniów z apticznym jestkù. Òkróm kùpiszów je to téż leżnosc do pòtkaniô, kôrbiónczi, pòznaniô nowëch lëdzy, a dzãka temù wiãkszégò zrozumeniô dlô naji lokalny kùlturë i tradicje.

***

Lubòtnicë biesadny mùzyczi mùszą przëjachac 4 lëpińca do Òstrzëców (parking kòl Pùnktu Turisticzny Infòrmacje), gdze ò sódmi pò pôłnim bãdze X edicjô Kaszëbsczi Galë Wieselnëch Karnów przërëchtowónô bez Gminowi Òstrzódk Kùlturë w Somòninie. Célã rozegracje je prezentacjô nôcekawszich a nôbarżi òriginalnëch mùzyczno-wókalnëch karnów a téż pòdskôcanié karnów do dalszich ùtwórczich pòszëkiwaniów i ùtrzimanié wieselny tradicje. Na binie wëstąpią mùzyczné karna: Relax, Limith, Amando, Rep-leys, Pulsband, kapele: Tuba Band a Pod Nóżkë, a téż Józwa Masiak.

Wëdarzenié pòprowadzą Agnés Łukasik a Pioter Szëca. Wstãp je za darmôka, a relacjã z przezérkù mòże słëchac w Radio Kaszëbë.

***

Jeżlë lubisz dokùmentalné filmë, a òsoblëwie tikającé sã tatczëznë i lëdzy z nią sparłączonëch, to zarezerwùj so czas, żebë przëjachac 4 lëpińca do Wdzydz. Ò dzesąti pò pôłnim na terenie Mùzeùm – Kaszëbsczégò Etnograficznégò Parkù miona Tédorë i Izydora Gùlgòwsczich bãdze premiera filmù pòd titlã „Takie było nasze życie” aùtorstwa Andrzeja Jastrzembsczégò – bëlnégò fòtografa a aùdiowizualnégò ùtwórcë.

Herojã dokùmentu je Antóni, 95-latny miészkańc Wdzydz. Dzãka wiele gòdzënóm kôrbiónków z nim, reżiséra ùsôdzôł snôżą a farwną òpòwiesc. Wasta Antóni je swiôdkã historie swòji môłi tatczëznë, nórcëka Kaszëb, jaczi leżi nad jezorã Wdzydze i jegò òkòlim. Wspòminô żëcé przed II swiatową wòjną, czej béł knôpã, realia tradicyjny, wiesczi spòlëznë. Gôdô téż ò wòjnowëch czasach, ze wszëtczima niebezpiekama, trudã a smùtkã. W dozdrzeniałim żëcym swòjim dzejanim wspiérôł rozwij wdzydzczégò skansenu a òdkrił rzezbiarsczi talent. Jegò dokaze są w priwatnëch kòlekcjach a téż ùpiãkszają kòscół w Wąglëkòjcach. Wasta Antóni w filmie òdkriwô przed òbzérôczama krëjamnotë swiata, jaczi znaje òd dzecka. Na nen swiat skłôdają sã môle, lëdze, pamiãc ò lëdzczich dramatach a… nadprzërodzoné zjawiszcza.

***

Òstrzódk Kùlturë i Spòrtu w Żukòwie przërëchtowôł dlô lubòtników lëdowégò kùńsztu warkòwnie kaszëbsczégò wësziwkù, gdze pòd òkã mésterczi Bernadettë Reglińsczi mdzeta miec leżnosc nôùczi jedny z nôbëlniészich fòrmów regionalnégò rãkòdzeła.

Zajmë są za darmôka, a bëtnicë i bëtniczczi ni mùszą miec niżódnégò doswiôdczeniô, le blós chãcë i fejn nastôwienié.

Warkòwnie bãdą 5, 12 i 19 lëpińca w gòdzënach 10–13 w kònferencyjny zalë Òstrzódka Kùlturë i Spòrtu w Żukòwie. Zapisë rëgnãłë 24 czerwińca i je nót chùtkò sã zapisac, bò lëczba wòlnëch placów je ògrańczonô.

Wicy na: www.strefazajec.pl.

***

5 lëpińca wszëtczi Kaszëbi (i nié leno òni) są rôczony do Szëmôłda, a to z leżnoscë XXVI Swiatowégò Zjazdu Kaszëbów, jaczégò òrganizatorã je Gmina Szëmôłd razã z Kaszëbskò-Pòmòrsczim Zrzeszenim.

W òbrëmim wëdarzeniô żdaje na przëbëłëch gòscy wiele atrakcjów. Tradicyjno mdze to wiôldżi farwny przemarsz Kaszëbów na przédny plac rozegracje – spòrtowi stadión, gdze mdze przërëchtowónô bina a téż wiele stojiszczów lëdowëch artistów a Kòłów Wiesczich Gòspòdëniów. W programie nalézeta bicé rekòrdu w jednoczasny jigrze na diabelsczich skrzëpicach, wiele warkòwniów a zôbawów dlô familiów z dzecama, a przede wszëtczim bëlné mùzyczné wëstãpë, bò na binie bãdą m.jin. Dãtô Òrkestra Baczków, Karno Kòleczkòwianie, Fukus, Kaszëbskô Influencerka a Werónika Kòrthals. Gwiôzdą wieczoru mdze Małgòrzata Òstrowskô ze swòjim mùzycznym karnã.

Na wëdarzenié mòże jak wiedno przëjachac baną, le w tim rokù blós do Lëzëna (stądka dali jedzeta aùtobùsã do Szëmôłda).

Wicy ò wëdarzenim nalézeta na: https://szemud24.pl/wielkie-swieto-kaszubow-juz-w-nastepny-weekend-xxvi-swiatowy-zjazd-kaszubow-n1498

***

Mùzeùm Kaszëbskò-Pòmòrsczi Pismieniznë i Mùzyczi we Wejrowie rôczi do se familie na redotné i fùl energie pòtkania z lëdowim tuńcã – bez stresu, bez prób, za to z ùsmiéwkã i pòspólną zôbawą. Warkòwnie bãdą 6 lëpińca ò piąti pò pôłnim na balowi zalë wejrowsczégò mùzeùm i mdą dérowac kòl 2 gòdzënów. Jeżlë wa jesta chãtny, to je nót pierwi sã zapisać mailowo wëséłającë zgłoszenié na adres [email protected].