Co? Dze? Czedë? [4.11-9.11.2024]

    4 smùtana ò piąti pp. (17:00) rôczimë w miono òrganizatorów na Gduńsczi Ùniwersytet (Bùdink Neòfilologie kòl sz. Wita Stwosza 51, zala nr 0.34) na pòtkanie z prof. Jòzefã Bòrzëszkòwsczim, gdze mdze leżnosc pòkôrbic na témã  „Wzorce osobowe inteligencji Pomorza na przełomie XIX i XX w.” Wëkłód ò taczim titlu ùkózół sã ju rëchli na karnôlu YouTube Kaszëbskò-Pòmòrsczégò Zrzeszeniô i je nót gò òbzerac, żebë wząc ùdzél w zéńdzenim (pòwrózk do ti prelekcje: https://youtu.be/ZyaTcBWj2FM?si=V-iWwmFJaXyBoa70).

Hònorowi przédnik Kaszëbsczégò Institutu rozwôżô w nim, jak apartné pòliticzné i spòlëznowò-gòspòdarczé dzeje Pòmòrzégò pòd prësczim panowanim miałë cësk na ùsztôłtowanié sã òsoblëwi mentalnoscë, wôrtnotów i pòzdrzatkù Pòmòrzanôw.

   5 smùtana ò pierszi pp. (13:00) w Dodomù Wiedemana kòl sz. Krótkô 6 w Gduńsczim Pruszczu òdbãdze sã òtemkniãcé wëstôwkù #StolenMemory, jaczi òpòwiôdô ò kawlach ùstëgòwónëch – sôdzowników kòncentracyjnëch lôgrów w cządze II swiatowi wòjnë.

Kampaniô #StolenMemory, jakô zaczã sã w 2016 rokù, mô za cél nalezenié krewnëch òfiarów nazystowsczégò ùstëgòwaniô a òddanié jima pamiątków – òsobistëch rzeczi ùmarłëch. Biżuteriô, òdjimczi, dokumentë – nazyscë kònfiskowelë wszëtczé òsobisté zachë lëdze zamkłëch w kòncentracyjnëch lôgrach. Do dzysdnia ùchòwało sã czile tësąców taczich rzeczi.

Całą historiã i dejã projektu nalézesz na starnie: https://www.stolenmemory.org/pl/#.

Wëstôwk mòże darmôk òbzerac do 25 smùtana.

   6 smùtana ò szósti pp. (18:00) w Mùzeùm Kaszëbskò-Pòmòrsczi Pismieniznë i Mùzyczi we Wejrowie (Ksążnica prof. Labùdë) mdze promòcjô ksążczi „Parafia Smażyno (1862–1945) na tle dziejów ewangelickiej diecezji Wejherowo” i pòtkanié z ji aùtorã Andrzejã Januszã. Kôrbiónkã pòprowadzy Adóm Lubòcczi.

Ksążka òdkriwô nieznóné prôwdë ò ewanielëcczi wespòlëznie na Kaszëbach. Pùblikacjô òpisywô historiã parafie i dzejania ksãżi w stojiznie nôrodnëch spiérków. Wpisywô dzeje môłi spòlëznë w szerszi òbrôz pòlskò-miemieckò-kaszëbsczich òdnieseniów.

Pùblikacjã mòże kùpic na: https://bit.ly/3UBFnfM

   Radzëzna Dzélnicë Śródmieście i Kònsulat Kùlturë w Gdinie rôczą na cykl szpacérów pò Gdinie. Òd séwnika do gòdnika mieszkańcowie a lubòtnicë gardu mdą miec leżnosc, bë òdwiedzëc jegò wëjątkòwé ùstróńczi i pòznac nieznóné historie. Wanodżi pòprowadzą znóny gdińsczi prowadnicë, pasjonacë i badérzë historie Gdinie.

Szpacérë zaczinają sã wiedno pòd Kònsulatã Kùlturë kòl sz. Jana z Kolna 25, a nôblëższé terminë to:

7 smùtana, ò piąti pò pôłnim – téma: Pradzeje Gdinie; prowadnik: Matis Cwalińsczi

10 smùtana ò dwanôsti w pôłnié – téma: Gdińskô czwiôrtô władza – szlachã redakcje gdińsczich pismionów; prowadnik: Róbert Chrzanowsczi

Wicy na: https://fb.me/e/2w8DKlq1o

   8 smùtana ò gòdz. szósti pò pôłnim (18:00) w Stacje Kùltura òdbãdze sã prelekcjô dra Kamila Andułë (Wòjskòwé Historiczné Bióro we Warszawie) pòd titlã „Cisza przed burzą. Marzec 1945 roku w Rumi i okolicach”. Przed wëkładã mdze prezentacjô a òmówienié òdjimka Rëmie z séwnika 1945 rokù. Dzéń pózni (sobòta, 9 smùtana) ò dzesąti do pôłniô spòd Stacje Kùltura rëszô historicznô szpacéra pò Rëmi, gdze mòże òbaczëc òperacyjny teater biôtczi ò Rëmiã. Òb czas wanodżi zaplanowóné je téż pòtkanié z historicznyma rekònstruktorama.

Wicy na: https://fb.me/e/4eVgOngjV

   9 smùtana òd dzesąti do pôłniô (10:00) szëkùją sã czekawé warkòwnie pòd titlã „Od młynarza do piekarza”, jaczé mdą miec plac w Stôrim Młënie w Gołëbiu (pierszi dzél) i Pierszczewie (drëdżi dzél). Òb czas wëdarzeniô pòznôsz historiã Gołëbiô, młinarstwa i Kartuzów, a téż naùczisz sã mieleniô zbòżô i pieczeniô chleba. Na kùńc na bëtników kùrsu czekô biesada z kaszëbską kapelą.

Wicy na: https://fb.me/e/20zLg6mT1

  Jaczé prawa mómë më, jakno Kaszëbi? Kòrzistómë z nich? Jak mòże werifikòwać, czë pùblicznô władza realizëje mniészëznowé prawa? Ò co, kògò i jak pëtac?

Na te i waje jinszé pitania mdą miec starã òdpowiedzec Mateùsz Titës Meyer (wiceprzédnik Kaszëbsczi Jednotë) i Szëmón Òsowsczi (przédnik Òbëwatelsczi Sécë Watchdog Polska) w òbrëmim zéńdzeniô pòd titlã „Jawność na Kaszubach”, jaczé bãdze w Ksążnicë prof. Labùdë (Mùzeùm Kaszëbskò-Pòmòrsczi Pismieniznë i Mùzyczi we Wejrowie) 9 smùtana ò szósti pò pôłnim.

Wicy na: https://fb.me/e/hOcWvRQZj