Co? Dze? Czedë? [6.03-8.03.2025]

6 strëmiannika ò szósti pò pôłnim w Kòpernikarsczi Ksążnicë w Torniu mdze promòcjô pùblikacje pòd titlã „Marsz Śmierci. Ewakuacja piesza więźniów KL Stutthof i jego podobozów. 25 stycznia – 3 maja 1945” aùtorstwa doktora Môrcëna Òwsyńsczégò a Agnesë Kłës. Kôrbiónka z aùtorama ksążczi pòprowadzy dr hab. Sylwiô Grochòwina, prof. ÙMK. Òb czas wëdarzeniô mdze leżnosc òbzerac wëstôwk artefaktów Mùzeùm Stutthof we Sztutowie a téż jich jinszé pùblikacje („Była raz królewna mała. Bajka kaszubska ze Stutthofu” w òprôcowanim Bògùsławë Tartakòwsczi a Agnesë Kłës i „Bajki” Halinë Banasak).

Latos òbchòdzymë 80. roczëznã tëch wëdarzeniów. 25 stëcznika 1945 rokù we wczasnëch gòdzënach pòrennëch òbéńdã lôgru Stutthof òpùscëłë kòlumnë sôdzowników. Razã wnet 33 tësące lëdzy szło w Marszu Smiercë. Na skùtk ùmãczeniô, głodu, chòrosców, zëmna a sekùtnëch mòrdów żëcé stracëło kòl 17 tësąców z nich.

Mùzeùm Kaszëbskò-Pòmòrsczi Pismieniznë i Mùzyczi we Wejrowie sertno rôczi na zéńdzenié ze Staszą Bùdzysz. Repòrtérka, filmòznajôrka, dolmaczérka, pòdkasterka a gazétniczkã, co pùblikùje dlô Okopress.pl, Pòliticzny Kriticzi, Nowi Zôpadny Eùropë i Przekroju. Absolwentka pòlsczi a rusczi filologie na Gduńsczim Ùniwersytece i Pòlsczi Szkòle Repòrtażu.W 2019 rokù zadebiutowa repòrterską ksążką „Pokazucha. Na gruzińskich zasadach”. Dzysdnia nôbarżi je znónô ze swojégò repòrtażu pòd titlã „Welewetka. Jak znikają Kaszuby”.

Pòtkanié, jaczé pòprowadzy Bògùsza Cërockô, mdze 7 strëmiannika ò piąti pò pôłnim w Pałacu Przebendowszich i Keyserlingków kòl sz. Zamkòwi 2a.

Mùzeùm Westrzédnégò Pòmòrzô w Słëpskù sertno rôczi na prezentacjã ksążczi prof. Wòjcecha Skórë pòd titlã „Słupsk 1945. Miasto w pamięci Niemców, Sowietów i Polaków. Wspomnienia i dokumenty”, jaczé bãdze w piątk 7 strëmiannika ò piąti pò pôłnim w wernisażowi zalë w Biôłim Spikrzu kòl. Szarëch Szeregów 12.

Wòjcech Skóra to ùczałi, jaczi robi na Pòmòrsczim Ùniwersytece w Słëpskù. Je m.jin. regionalistą a badérą nônowszi historie Pòmòrzégò. Za pierszi tom pòwëższi ksążczi dobéł Pòmòrską Lëteracką Nôdgrodã „Wiatr od morza” w kategórie „Pòmòrskô Ksążka Rokù”.

W pùblikacje pòznajemë wspòminczi bëtników wëdarzeniów a historiczné dokùmentë. Dzãka nima czëtińcowie mają leżnosc blëżi pòznac a zrozmiec wëdarzenia sekùtnëch miesąców 1945 rokù, a mòże nawetka nalezc bez kôrtczi pùblikacje swòjich przódków.

Na zéńdzenim mòże kùpić òbëdwa dzéle ksążczi. Wstãp je darmôk.

Na gminowé òbchòdë dnia białków rôczi Gminowi Dodóm Kùlturë w Lëni, jaczi rëchtëje rozegracjã w swòji sedzbie (kòl sz. Szkòłowi 1) 8 strëmiannika ò szósti pò pôłnim. W òbrëmim programu bãdą wëstãpë mùzykanta Daniela Rehmusa, a téż mdze kaszëbsczi szpòrtowny akcent wëdarzeniô, bò na binie bawic gòscy mdze kabaret Kùńda. Òb czas rozegracje òrganizatór zagwësniwô jestkù.

Wstãp je darmôk, le nót je rëchli sã zapisac online (https://fb.me/e/2NwXbEfNC) abò pòd numrã 799-052-537.