Co? Dze? Czedë?

Na gòdowi ôrt mòżeta bawic sã w rozmajitëch môlach na Kaszëbach jesz do 21 stëcznika z duetã Werónika Kòrthals i Paùel A. Nowak. Jich interpretacje pòlsczich i
kaszëbsczich melodiów są fùl emòcjów i głãbòczégò òddaniô, dzãka czemù mòże pòczëc nôstrój Gòdów.
„Nad Kaszëbama gòrô gwiôzda” to nié blós titel kòncertowégò cyklu, le téż nônowszi platczi, jaką artiscë mdą promòwać òb czas swòjich rozegracjów.

Benedyktynczi z Żarnówca rôczą na warkòwnie malënkù ikònów, jaczé òdbiwają sã w dwùch turnusach: 13-19 stëcznika (Ikòna Jana Chrzcëcela) i 12-18 maja (Matka
Bòskô Eleusa). Ùdzél w projekce to nié blós nôùka krëjamnotów tadicyjnégò malarsczégò rzemiãsła, le téż teòlogiczné wëkładë a pòznanié i zagłãbienié sã w
ritmie benediktińsczi mòdlëtwë i rozmëszlaniô.
Wicy na: https://www.benedyktynki-zarnowiec.pl/warsztaty-ikon-w-i-polowie-2025-roku/

Stãżëcczi part Kaszëbskò-Pòmòrsczégò Zrzeszeniô rôczi lubòtników kaszëbsczi kùlturë na nadzwëkòwi cykl filmòwëch pòkazów do projekcyjny zalë Gminny
Pùbliczny Biblioteczi w Stãżëcë. Na pierszim z trzech filmòwëch wieczorów, jaczi mdze 13 stëcznika ò ósmi pò pôłnim, òbôczimë dwa dokazë: „Na Kaszubach” i
„Kaszubscy Książęta”.

Karno Kaszëbsczégò Wësziwkù rôczi wszëtczich lubòtników tegò lëdowégò kùńsztu do Wieżëcë. Stôwiôsz pierszé kroczi we wësziwkù abò twòrzisz, le nie jes gwësny swòjégò kùńsztu? Môsz pragniączkã, żebë zbògacëc sã ò nowé techniczi a ùdbë? Chcesz pòtkac bëlną spòlëznã kreatiwnëch lëdzy i sóm jã bùdowac? Jeżlë tak je, to w miono òrganizatorów rôczimë na warkòwnie, jaczich pierszé zéńdzenié bãdze sã 13 stëcznika w Kaszëbsczim Lëdowim Ùniwersytece!

Pòwrózk do zgłoszeniowégò fòrmùlarza:

https://forms.gle/JugXyfDCTdyg4qos9

Mòrsczi Lëdowi Ùniwersytet rôczi na zajmë kaszëbsczégò jãzëka dlô dozdrzeniałëch, jaczich zôczątk mdze 13 stëcznika w Rédze (Zakątek Wyobraźni) kòl sz. Òbwòdowi 29A. Wiôlgô frekwencjô ë bëlnô atmòsfera slédnëch ùczbów a téż stolëmnô wiédzô szkólny Anë Hébel zapòwiôdô wiele chãtnëch do ùdzélu w tëch jãzëkòwëch warkòwniach, tej bez òbscyganiô zapiszëta sã ju dzysô!

Zajmë są za darmôk!

Pòwrózk do zgłoszeniowégò fòrmùlarza: https://bit.ly/42dTQmR