Szesc dni dérowało wëcyganié amerikańsczégò pancernégò wòzu w Pòbrodzym. Wcyg nie òstôł nalazłi czwiôrti żôłnérz.
W pòniedzôłk trzëdzestégò pierszégò strëmiannika reno ùdało sã wëcygnąc z błota w môlëznie Pòbrodzé (Pabradė) na Lëtwie wòjskòwi wóz amerikańsczi armie, jaczi òstôł tam nalazłi w strzodã. Akcjô wëcyganiô pòjazdu dérowała tak długò, bò sétmëdzesąttonowi transpòrtér béł zanorzony sztërë métrë pòd wòdą i pòd dwamétrowô wiôrztą kału. Robiłë przë tim dwa jinszé transpòrterë i dwa bùldożerë, a przez to pò szesc dniach ùdało sã wënorzëc wóz. Tam téż nalazłé sã cała trzech ze sztërëch amerikańsczich żôłnérzów, jaczi zadżinãlë we wtórk razã ze swòjim pòjazdã òb cwiczënczi. Generalnô prokùratura Lëtwë zbadérëje przëczënã smiercë. Szukelë jich Amerikanie, Lëtwinie a téż wspiarcé z Pòlsczi. Wcyg mdze prowadzonô szëkba za czwiôrtim żôłnérzã. Prezydent Lëtwë Gitanas Nausėda wërazył żôl i smùtk a téż złożił kòndolencje blëżnym ùmarłëch żôłnérzów i wszëtczim Amerikanóm.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie