Ùretóny zjeżdżôł na pùrgach pò norwesczich górach mët z dwòjgã jinëch turistów.
Krótkò pò dwanôsti w nocë we strzodã dzewiãtnôstégò strëmiannika w òbéńdze ùsadzony w górach gminë Lyngen na nordze Norwegie zeszła lawina. Przed ji wëstãpiwanim przódë òstrzégałë môlowé wëszëznë, le nimò to troje turistów zeza grańcë pòszło w górë pòzjeżdżac na pùrgach. Jednégò chłopa lawina ùsadzëła pòd półtoramétrową wiôrztą sniegù. Wedle znajarzów w taczi leżnoscë wikszosc lëdzy dëszi sã w dzesãc minut. Równak turista miôł wiôldżé szczescé, bò nalôzł sã w lëftowi czeszenie, w jaczi nié blós sygło mù lëftu na sétmë gòdzyn, ale miôł téż syg w mòbilce i mógł zazwònic pò pòmòc. Ùretowelë gò retownice z psama. Drëdżi chłop òstôł pòrwóny przez lawinã i zepchłi do fiordu niżi gór. Dôł radã wińc na sztrąd i téż skòntaktowôł sã ze służbama. Nie je równak wiedzec, co sã stało z białką, jakô jima towarzëła. Służbë zadecydowałë ò rëgniãcym z szëkbą za turistką.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie