Nowi senegalsczi prezydent zjiscywô przërzeczënk wëcopaniô bëtnoscë francësczich wòjsków ze swòjégò kraju. Do kùńca rokù Senegal mô bëc wòlny òd Francëzów.
W piątk sódmégò gromicznika Francjô zaczãła wëcopiwanié swòjich wòjsków z Senegalu. Òddała pòd kontrolã tegò kraju niebrëkòwóné ju bazë w Marechal i Saint-Exubery, niedalek pòrtu Dakar. Do kùńca latoségò rokù bëtnosc francësczich żôłnérzów w Senegalu mô sã skùńczëc, tak jak w ùszłëch latach w jinëch dôwnëch francësczich kòloniach, jak Mali, Bùrkina Faso, Niger, Czad i Ùbrzég Słoniowëch Kłów. Wëszëznë tëch krajów rozrzeszëłë swòje dotëchczasné ùgôdënczi z Parizã, jidącë za rozkòscerziwającą sã w tim regionie kòntinentu panafrikańską deją. Wëcopanié wòjsków z Senegalu je tedë partã wikszégò programù. Miôł ò to starã rządzący òd łońsczégò rokù senegalsczi prezydent Bassirou Diomaye Faye, chtëren gôdô ò se jakno ò lewiznowim panafrikanisce. Zapòwiedzôł téż rëmanié zaòstałosców francësczégò kòlonializmù w pùblicznym rëmie, midzë jinszima w pòzwach szasëjów w Dakarze. Program zdôwaniô wòjskòwëch bazów nie bãdze òbjimôł francësczi bazë w Dżibùti, gdze Francëzowie òstóną. Tamecznô baza mô òstac wëpôdënkòwim pùnktã dlô misjów w Africe.
H.S.Sz.
Twoje zdanie jest ważne jednak nie może ranić innych osób lub grup.
Komentarze opinie