Co? Dze? Czedë? [11.02-16.02.2025]

Rôczimë na finisaż pòplenerowégò wëstôwkù dokazów Lëdowëch Ùtwórców, jaczi mdze dwanôstégò gromicznika ò piąti pò pôłnim w sedzbie Kaszëbsczégò Fòrum Kùlturë kòl al. Marszôłka Piłsudsczégò w Gdinie. Za mùzyczny òprôwk mdze òdpòwiedzalny duet – Tomôsz Fópka (spiéw) a Wòjcech Złoch (akòrdión) – w programie midze jinszima mdą kaszëbsczé tanga. 

Łoni w zélnikù béł Plener Lëdowëch Ùtwórców w Gdinie, przërëchtowóny bez Kaszëbsczé Fòrum Kùlturë a Gdinsczi Part Kaszëbskò-Pòmòrsczégò Zrzeszeniô. Kùńsztméstrowie z rozmajitëch ùstrónków Kaszëb, co słëchają do Stowôrë Lëdowëch Ùtwórców gdinsczégò partu pòtkelë sã w Szkòłowò-Przedszkòłowi Zrzeszë nr 5 w Gdinie. Twòrzëlë dokazë w różnëch technikach: malarstwò, kaszëbsczi wësziwk, ùplotë itd.

***

Jeżlë chcesz pòczëc prôwdzëwie mrozné wiodro w pòstacje snôżich zëmòwëch krôjmalënków, to rëgni trzënôstégò gromicznika ò piąti pò pôłnim do sedzbë Mùzeùm Kaszëbskò-Pòmòrsczi Pismieniznë i Mùzyczi we Wejrowie, gdze mdze wernisaż wëstôwkù pt. „Zimowy spokój. Fotografie autorstwa Augustyna Ziemensa”. 

Aùgùstin Ziemens béł bëlnym wejrowsczim fòtografã z przełómaniô dzewiãtnôstégò i dwadzestégò wiekù. Jegò pasją bëła fòtografiô, dzãka jaczi ùwiecznił codniowé żëcé a  architekturã gardów i wsów nordowëch Kaszëb, taczich jak Wejrowo, Gduńsk, Hél a Gdiniô. Ziemens òstawił pò sobie bòkadną òdjimkòwą spôdkòwiznã, jakô je wôrtnym zdrzódłã wiédzë ò historie i kùlturze regionu.

„Je nót wiedzec, że zëmòwô fòtografiô nie je baro pòpularnô. Mało robiło sã na zôczątkù dwadzestégò wiekù òdjimków w zëmòwi aùrze. Mómë to szczescé, że we Wejrowie béł taczi ùtwórca, jaczi widzôł snôżosc w zëmòwëch landszaftach i ùjął je na swòjich òdjimkach” – gôdô Aleksandra Selickô, jakô òb czas wernisażu mdze miec wëkłôd a téż òprowadzy gòscy pò wëstôwkù.

***

Chto chce napisac wôrtny projekt sparłączony z kaszëbizną, mòże skòrzëstac z bëdénkù Gminë Somònino i Fùndacje Rozwiju Lokalny Demòkracje, to je darmòwëch warkòwniów dlô lëdzy zainteresowónëch pisanim wniósków ò grantë a przërëchtowanim pùblicznëch zadaniów. Jeżlë môsz fejn ùdbã a chcesz jã wprowadzëc w żëcé, to rôczimë trzënôstégò gromicznika ò czwiôrti pò pôłnim  do sedzbë Ùrzãdu Gminë Somònino kòl sztrasë Ceynowë.

Wicy na: https://somonino.pl/asp/szkolenie-dla-organizacji-pozarzadowych,260,artykul,1,4203

***

Blós do sztërnôstégò gromicznika dérëje rekrutacjô do kònkùrsu òrganizowónégò bez Mùzeùm Kòscersczi Zemie w Kòscérznie „KASZUBI WCZORAJ I DZIŚ”, jaczi mô latos titel „Śladami Jerzego Sampa po Pomorzu, Kaszubach i Gdańsku”. 

Kònkùrs je adresowóny do szkòlôkôw szóstëch, sódmëch i ósmëch klasów spòdlecznëch szkòłów z òbrëmiô pòmòrsczégò wòjewództwa.

Wicy na: https://muzeumziemikoscierskiej.com.pl/edukacja/konkursy/

***

Téż blós do sztërnôstégò gromicznika mòżeta słac swòje dokazë na Òglowòpòlsczi Kònkùrs Kaszëbsczi Mòwë „Bë nie zabëc mòwë starków" miona Jana Drzéżdżona, jaczi je przërëchtowóny bez Mùzeùm Pùcczi Zemie miona Floriana Cenôwë. Òbrzészkã bëtnika kònkùrsu je napisanié krótczégò tekstu pò kaszëbskù, nagranié gò a pòtemù òdesłanié do pùcczégò mùzeùm.

Wicy na: https://muzeumpuck.pl/konkursy/

***

To ju slédny rôz, czej mòżeta wząc ùdzél we widzawiszczu „Rodzanice” w reżiserie Éwë Ignaczak, na spòdlim wëjimków pòwiescë Barbarë Piórkòwsczi „Kraboszki”. Nôleżniczczi karna Akademia Głosów Tradycji wëstąpią na binie gdińsczégò teatru (Plac Kònstitucje 1) sztërnôstégò gromicznika ò sódmi pò pôłnim. 

Widzawiszcze to emòcjonalnô historiô zmianë białczënégò kawla. Je òno przemikłé wrazlëwòtą, słowiańsczima wierzeniama i swiatã rodë, jaczi przeplôtô sã z drãgą codniowòscą.

Wicy na: https://fb.me/e/5fYNP6T5w

***

Dali môta wiele leżnosców do òbzéraniô nowégò filmù Béjatë Hincke pòd titlã „Drëszk”, jaczi je slédnym dzélã kaszëbsczi trilogie („Manteltréger” i „Zgniélc”). W tim tidzeniu òbôczita seanse sztërnôstégò gromicznika ò piąti pò pôłnim w Dodomù Rëbôka we Wiôldżi Wsë a piãtnôstégò gromicznika ò szósti pò pôłnim w Klubie Kùlturë w Sławùtowie.

W filmie ùdzél biorą mieszkańcowie nordowëch Kaszëb, midzë jinszima z Gniéżdżewa, Chłapòwa, Strzelëna a Nôdolô. Wstãp je darmôk!

***

W slédnym czasu na całëch Kaszëbach rëchtowóné są wëdarzenia sparłączoné ze sto piątą roczëzną zdënkù Pòlsczi z Mòrzã. Mùzeùm Pùcczi Zemie miona Floriana Cenôwë przërëchtowało téż bëdénk w òbrëmim ti témë – czasowi wëstówk pòd titlã „Powroty”. Wëstôwk òpòwie nama trzë historie, jaczé są òpòwiescą ò pòwrotach, tëch wiôldżich, nad pòlsczi Bôłt, a tëch òsobistëch, priwatnëch pò dzejowëch rëchawach. Wëstawa mdze dérowac do kùnca strëmiannika.

***

Part Kaszëbskò-Pòmòrsczégò Zrzeszeniô w Chwaszczënie a Òstrzódk Kùlturë i Spòrtu w Żukòwie rôczą na zéńdzenié z Darią Kaszëbòwską – kaszëbską pisôrką, gazétniczką a spòlëznową dzejôrką. W swòjich tekstach pòrësziwô témë zrzeszoné z historią i tradicjama Kaszëb. Pòtkanie mdze szesnôstégò gromicznika piãtnôsce pò czwiôrti pò pôłnim w Strefie Kùlturë w Chwaszczënie kòl sztrasë Żeromsczégò. 

***

Narôdné Mùzeùm we Gduńskù rôczi szesnôstégò gromicznika ò pierszi pò pôłnim na òprowôdzanié pò Òddzélu Dôwnégò Kùńsztu, a òsoblëwie pò wëstôwkù pòd titlã „Pobożni i cnotliwi. Dawni gdańszczanie w zwierciadle sztuki”. 

Wëstôwk prezentëje wëjątkòwé òbiektë ze zbiorów Nôrodnégò Mùzeùm, jaczé pòzwòlą nama lepi zrozmiec òficjalné narracje gduńsczich elit, jak i codniowòsc mieszkańców.

Wicy na: https://fb.me/e/4u66uAIzi